21 lak tam ki nongthep vote ha Meghalaya, 10 lak tam ki shynrang bad kynthei, 2 ki Transgender

Shillong, K’lyngkot, 4: Ka Jylla Meghalaya ka la kynjoh sha ka 21,61,129 lak ngut ka jingdon jong ki nongthep vote ha kaba 10,68,801 ngut ki dei ki shynrang bad 10,92,326 ngut ki kynthei. Nalor kine ki don 2 ngut ki Transgender.
Katkum u kyrwoh ba la phah da u Chief Electoral Officer jong ka Jylla u Bah FR Kharkongor, yn sa pyllait ïa ka Electoral Rolls na ka bynta ka Special Summary Revision of 2023 lashai ka sngi Palei.
Ïa ka Special Summary Revision-2023 la sdang ha ka 9 tarik, Naiweing, 2022 da ka jingpynbna paidbah ïa ka Draft Publication of Electoral Rolls ha baroh kawei ka jylla.
U CEO u la pyntip ruh ba 63763 ngut ki don ki nongthep vote ba la aplai thymmai ban pynrung kyrteng lyngba ka Form 6 hashwa ban pynkut ïa ka Special Summary Revision jong u snem 2023.
Hadien ka jingbishar, la shem ba ka jingkiew jong ka jingdon jong ki nongthep vote ka la kiew sha ka 49915 hajar ngut.
Shuh shuh u la pyntip ba ki don 3844 ngut ki Service Electors.
La shem ruh ba ka jingpynrung kyrteng jong ki Kynthei haduh 10,92,326 lak ngut ka kham kiew bha ban ïa ki shynrang. Baroh lang haba kheiñ kyllum ka jingkiew jong ki nongthep vote ka long 2.36 % na ka jingdon jong ki nongthep vote katkum ka Draft Rolls haduh ka 9 tarik, Naiwieng, 2022. Ka jingkhuid ha kaba pynrung kyrteng ka dei ka thong kaba hakhmat eh jogn ka Election Commission of India (ECI).
U CEO u la pyntip ruh haduh 13848 hajar ngut ki kyrteng jong ki nongthep vote la weng na ka Electoral Rolls halor ka nongrim ba ki la khladnoh, ki la pynkynriah ïa ki jaka sah bad kiwei kiwei. Kumjuh ruh, haduh 40700 ngut ki nongthep vote kiba la pynbeit ïa ki kyrteng ha kane ka sien ba mynta.
Ka jingpynlong ïa ka Special Summary Revision-2023 ka long kaba khuid ba suba bad kaba shai. La pynlong ruh ïa ki jingïalang ïathir ïatai ha ka kyrdan jong ki CEO bad ha ka kyrdan jong ki Deputy Commissioner ryngkat lang bad ki nongmihkhat jong ki seng saiñpyrthei khnang ban pynthikna ba kane ka kam kan long kaba khuid.
Ka jingpynrung kyrteng ka long ruh na ka bynta ki briew kiba don jingduna ha ki dkhotmet kaba kot haduh 7478 ngut.
Haba phaidien sha snem 2018, ka jingdon jong ki nongthep vote ka la kiew haduh 18%, ha kaba 4,29,062 ngut ki nongthep vote ba thymmai la pynrung na kaba la kheiñ lang ha u snem 2018.
Ïa mynta, ka EP Ration ka long 64.53%, ka Gender Ratio ka long 1022, bad ka jingpynrung kyrteng ïa kiba la kynjoh ha ka rta kaba 18-19 snem ka long 81,443 hajar ngut haduh mynta.
Haba ïanujor bad ka jingdon jong ki 3083 tylli ki Polling Stations ha u snem 2018, baroh ki Polling Stations haduh mynta ki la nang kiew sha ka 3482 tylli.