Shillong, Kyllalyngkot 04: Da kaba kynthup lang ïa ka kyrteng u Bah Gavin M Mylliem, MLA ka Sohra bad u Bah Banteidor Lyngdoh, MLA ka Mawkynrew, ka People’s Democratic Front (PDF) ha ka nohphai sngi 4 tarik u Kyllalyngkot, 2023 ka la pynbna ïa ka thup kyrteng ba nyngkong jong ki kyrtong jong ka na ka bynta ka elekshon sha ka Ïing Dorbar Thawaiñ ka Jylla Meghalaya mynta u snem 2023.
Nalor kitei ki ar ngut, ka PDF ka la pynbna ruh sa 6 ngut ki kyrtong ba kynthup ïa u Bah Shemhok Garod na Raliang, u Bah Roswel Shadap na Mawhati, u Bah Donlang Sohkhlet na Umsning, u Bah Romeo Phira Rani na East Shillong, u Bah Egenstar Kurkalang na Nongkrem bad u Bah Auspicious L Mawphlang na Mawphlang Constituency.
Haba pyntip ïa kane, u Bah Gavin M Mylliem, President ka Party u la ong ba ka Central Election Committee (CEC) ka la shong ïa ka jingialang ha katei hi ka sngi bad shim ïa ka rai ban pyllait shwa ïa ka thup ba nyngkong jong 8 ngut ki kyrtong katba ïa ka thup kaba ar yn sa pyllait noh shen ryngkat ka thup ki mat kular elekshon (Election Manifesto).
Haba kylli, u la ong ba ka Party kan pynleit jingmut hapdeng 10 haduh 15 tylli ki Constituency kiba ka don ïa ki kyrtong kiba lah ban jop ïa ka elekshon. Halor ka jingthmu mih noh u Bah Hamletson Dohling, MLA ka Mylliem bad u Bah Jason S Mawlong, MLA na Umsning na ka Party ban ïakhun pat ïa ka elekshon MLA ka National People’s Party (NPP), u Bah Gavin u la ong ba ym lah ban pynbor ban khang ïa ka mon jong kiwei.
U la ong ka don ka jingktah ïa ka Party lada ki MLA ki mih noh bad ka Party ka la ïoh ban sei kyrtong na Umsning katba na Mylliem pat watla ka Party ka treikam bha ruh hynrei haduh mynta kim pat lah rai ban sei kyrtong.
Na ka liang u Bah Banteidor uba la phla paidbah ba u la shah tyrwa san klur ban ïakhun na ka NPP, da la ai khublei kitbok ïa ki MLA ban mih noh na ka Party u la kyntait ban kynthoh eiei halor ka jingkylli la kitei ki MLA ki mih na ka Party ïoh don ka jingtyrwa kumba la tyrwa ïa u.
“Ngam lah ban kynthoh eiei namar ka kam shimet bad ym don ba lah ban tip”, la ong u Bah Banteidor uba dei ruh u Myntri ha ka Sorkar Jylla Meghalaya ba mynta bad uba bat kum u Working President ka Party.
