Shah kem 5 ngut kynthup u nongïalam BJP ba hiar thma ïa ka ïingmane Katholik ha Chhattisgarh

Shillong, K’lyngkot 04: Hadien ar sngi ba ki shit niam ha ka jylla Chhattisgarh ki la hiar thma bad pynjulor ïa ka Ïingmane jong ka Balang Katholik jong ka Parish ka Dohnud Bakhuidtam u Jisu kaba kaba la shah pynjulor ka dei kaba hap hapoh ka jyllaniam bah Raipur ha ka shnong Edka jong ka District Narayanpur, Chattisgarh bad ba ha ka jinghiar thma ïa kane ka ïingmane ki shit niam ki la pynjulor ïa ki stashu jong ka Maria, ka stashu jong u Jisu, ïa ka Groto jong ka ïingmane bad kumjuh ïa ka jaka sah jong ki Phadar ar sngi hadien ki pulit jong ka jylla Chhattisgarh ki la kem ïa san ngut kiba donkti ha kane ka jinghiar thma uwei na ki uba la shah kem u dei u nongïalam ka BJP ha katei ka shnong.
Kine ki san ngut kiba la shah kem ki kynthup ïa u nongïalam ka BJP uba dei u President ka Narayanpur district uba la tip kyrteng kum u Rup Sai Salam 55 snem, u Pawankumar Nag 24 snem, u Atul Netam 24 snem, u Ankit Nandi 31 snem bad u Domendra Yadav 21 snem.
Kat kum ka khubor na ki pulit la ong ba kitei kiba la shah kem ki dei na ka shnong Bakhrupara laitnoh tang u Salam u nongïalam BJP uba dei na ka shnong Remawand jong ka Narayanpur District.
Kane ka jingkem ki pulit ïa kine ki san ngut ka long hadien ba ki la donkti ban hiar thma bad pyjulor ïa ka ïingmane bad kumjuh ban ktah kti pynmynsaw ïa ki pulit kat kum ka ejahar kaba la ujor pyrshah ïa ki saw phew ngut kiba ym shym la lah ban ithuh durkhmat kiba hiar thma ïa ka ïingmane bad kumjuh ïa ka skul jong kae ka Parish.
Shuh shuh kat kum na ka khubor na ki pulit katei ka jylla la ong ba ki la khang ïa ki arngut ki MP na ka BJP bad ïa u MLA ba kin leit rung sha ka district Narayanpur ïoh kan mih biang kano kano ka jingjia kaban pynthut ïa ka shong suk shong saiñ.
Kat kum ka ejahar kaba la rejister la kdew ba ka don ka jingpyrshang ban pynïap ïa ki shakri sorkar kiba dang leh la ka kamram, ka jingsuhbuit ban leh ïa ki kam be-aiñ, ka jingwanrah ïa ka jingïa umsnam, ka jingpyrshang ban wanrah ïa ka jingïa shun hapdeng ki ar kynhun da kaba wanrah ïa ka jingïa sngewpher niam bad kiwei kiwei ki kam be-aiñ bad na ka liang ki pulit ki la rejister ïa ka ejahar ha ki kyndon bapher bapher jong ka na ka liang ki pulit ki la pynngat ha kiba bun ki kyndon ka Indian Penal Code (IPC).
Kat kum ki khubor ba la pynmih da ka kot khubor Indian Express ka la kdew ba ki dkhot ka BJP kiba dei ruh ki MLA ki la pyrshang ban rah ïa ka mat jong ka jingkylla niam Khristan da ka jingpynbiej da ki balang ïa ki Advasi bad airuh ka jingthoh ba kin ïoh ïatai ha ïingdorbar ïa ka mat kylla niam.
“Ki riewlum Adivasi ba duk ki shah pynbiej ban kylla niam Khristan da ka pule puthi kaba ki balang ki ai bad ki kam shakri jong ki bad kumjuh ruh wat da ka pisa hynrei ka sorkar kam shym la leh eiei ban pynsahngeh ïa ka jingpynkylla niam ïa kine ki paid Adivasi. Kine ki riewlum kiba pyrshang ban pyrshah ïa kane ka jingpynkylla niam jubor da ka jingpynbiej ki balang Khristan ki shah shoh shah bom bad shah pynmynsaw ruh ha ki mishoneri jong ka balang hynrei ki pulit kim shym la kem eiei ïa kine ki mishoneri jin lada ki pulit ki kem ha ka por ba sdang btehi kane ka jingjia kan jin ym da poi shaduh une u pud,” ong ka jingthoh na ki MLA ka BJP kiba kwah ïatai ïa kane ka mat pynmih ha ka Indian Express.
Lah ban kdew hangne ba ha ka Lah Sngi u Blei ka don ka jinghiar thma da ki shit niam ïa ka ïingmane jong ka Balang Katholik namar ka jingkynnoh ba ka Balng ka jingpynkylla niam jubor ïa ki riewlum Adivasi bad ka jingtei be-aiñ ïa ki Ïingmane ha kane ka parish.