Shillong, Kyllalyngkot 4 : U Myntri Rangbah ka jylla u Conrad K Sangma lem bad u Symbud Myntri Rangbah u bah Prestone Tynsong uba peit ïa ka tnad pynmih bor ding mynta ka sngi ki la plie paidbah ïa ka Ganol Hydro Power Project kaba lah ban pynmih bor ding 22.5 MW. Kane ka Project ka don hajan Tura, West Garo Hills. La ïadon lang ruh ha kane ka sngi da u Myntri ka tnad ka koit ka khiah u James K Sangma .
Da kaba pynbna ba kane ka jingplie ïa kane ka projek ka long kum ka sngi ba sah kynmaw ha ka histori jongka ri lum Garo u Myntri Rangbah u la ïathuh ba ka jingpynlut ban tei ia kane ka dam pynmih bor ding electrict ka long haduh 560 klur tyngka bad la pyndep ruh ïa ka tang hapoh kine ki san snem ba kane ka sorkar MDA ka ïalam ïa ka jingsynshar. Ka jingthrang ka long ban buh ïa ka ri lum Garo ha ka map jong ki jaka pynmih bor ding ha ka ri.
U la ai jingïaroh ïa u James K Sangma uba la shim khia ha ka por ba u bat ïa ka tnad pynmih bor ding ban pynim pat ïa kane ka projek kaba la ïeh shrah da ka sorkar kaba rim da kaba la buh thong ba dei ban pyndep beit hapoh kine ki san snem. Dei na kane ka daw ba ka sorkar ka la rai ban pyllait pisa shuh shuh ban pyndep noh ïa kane ka project.
ïa kane ka projek la jan ïehshrah noh kumto namar ka jingduna pisa wat la ka sorkar ba rim ka la pynlut bun spah klur ruh. Hadien ba kane ka sorkar kala shimti ïaka jingsynshar ha u 2018 ka la pynthikna ba dei ban ïoh pisa ban pyndep ïa kane ka project kaba la buh mawnongrim naduh u 2014.
U la ong ba ka sorkar ka la rai ba la kumno kumno ruh dei ban pyndep beit ïa kane ka projek bad da kaba shim khia ka la lah da shisha ban pyndep ia kane ka projek. Da ka jinglah ban pyndep ïa kane ka projek ka sorkar ka la pynpaw hakhmat ki paid Garo ba kane ka sorkar ka don ka jingthrang ban wanrah ïa ka roi ka par naka bynta ka jingbha bad jingmyntoi ki paidbah.
Lyngba kane ka jaka pynmih bor ding kan ïarap shikatdei ruh ban pynduna ïa ka jinglip bor ding ba khah khah ha ri lum Garo,. U la ong ba ka sorkar kan buh thong ba yn dang tei shuh shuh ïa ki projek kiba heh ban pynkhlaiñ ka jingpynmih bor ding ha ka jylla namar ka jylla ka donkam kumba 380 MW ka bor ding hapoh ka jylla baroh kawei.
U la ai burom ruh ïa u Symbud Myntri Rangbah bad ïa ka tnad pynmih bor ding hi baroh kawei kiba la shim khia ban pynurlong ïa kane ka jingthrang ban pyndep ïa kane ka projek ba sahteng la slem bah.
ïa kane ka projek la tei da ka jingiatrei lang ka Meghalaya Power Generation Corporation lem bad ka Patel Engineering Ltd, Mumbai, Civil & HM Contractor Onycon Infra LLP, Mumbai, E & N Contractor Toshiba Plant Syster & Services Corporation, Japan.
