Mynta ka sngi yn hiar u CM bad Dy. CM ban pynthikna District ïa ka Sohra

0

Sohra, K’lyngkot 04: Hadien ba ka la ïaid lynti la kumba 40 snem kum ka Civil Sub Division, ka Sohra kan long noh ka District namar ha ka 5 tarik mynta u bnai u Myntri Rangbah u Conrad K Sangma lem bad u Symbud Myntri Rangbah bad kiwei kiwei ki myntri sorkar kin hiar sha Sohra ban pynthikna District ia ka Sohra.
Kane ka jingpynthikna ïa ka Sohra kum ka District kan long ha ka por 4 baje janmiet, ha kaba u Myntri Rangbah, u Conrad Sangma un ïakynduh ïa ki dkhot jong ka Sohra District Demand Forum bad ïa ki Khlieh Nongsynshar ha ka jingïalang ka ban long ha Circuit House, Saitsohpen, Sohra.
Ryngkat u Myntri Rangbah yn don lang ki Myntri ka sorkar kynthup ïa u Symbud Myntri Rangbah, u Bah Prestone Tynsong, u Myntri ka Tnad Urban u Bah Sniawbhalang Dhar bad kiwei kiwei .
Lah ban kdew hangne ba ka thaiñ Sohra ka la sdang ban dawa District naduh ki snem 2010 ter ter, hynrei ka kam ka la sahkut noh ha shiteng lynti ha kaba kiwei pat ki thaiñ ki la ïoh shuwa ïa ka District kum ka Khliehriat, ka Mawkyrwat, nangta ka Ampati, ka Resubelpara bad ka Mairang.
Ha ka por ba long Speaker u (L) Donkupar Roy, u Myntri Rangbah u la kular ban ai District ïa ka Sohra. Hynrei hadien ka jingkhlad noh jong u Dr. Roy, ka Mairang Civil Sub Division ka la ïoh noh shuwa kum ka Eastern West Khasi Hills District.
Hynrei wat la katta ruh ka Forum kaba la thaw ban pynkhreh ïa ka jingdawa District kam shym la shongthait, hynrei ryngkat ka jingïatreilang bad ka Hima Sohra bad kumjuh ruh ki Khlieh Nongsynshar bad ki Sengbhalang, ka la ïai bteng ïa ka kam da kaba leit pynlong jingïalang ha ki Shnong bapher bapher ka thaiñ Sohra, kata ha ki artylli ki C& RD Block,ka Laitkroh Khadarshnong Block bad Shella Bholaganj Block ban pan jingkyrshan na ki Sordar bad Rangbah Shnong.
Nangta ka Forum ka la ïoh jingkyrshan na ki Nongmihkhmat ka Sohra bad Shella Constituency.
Dei tad haduh ka jingïakynduh hapdeng ka Forum bad u Myntri Rangbah ha kine ki bnai baladep ba ka jingkyntiew kyrdan ïa ka Sohra Civil Sub Division sha ka District ka la sdang ban skhem haduh ba kan da urlong syndon.La sngewthuh ba ka District ba thymmai kan dei hi ha Sohra.

Leave A Reply

Your email address will not be published.