Donktilang ki party riewlum ban mynjur ïa ka CAB, kim lah satia ban thet kti : Congress

Shillong, K’Lyngkot 04 : Ka Congress ha ka sngi Balang ka la kynnoh ba ki party riewlum ruh ki don bynta lang ban mynjur ïa ka Citizenship Amendment Bill (CAB) ha Parliament ha u snem 2019.
“Baroh ki party riewlum ki don bynta lang, kim lah satia ban thet kti ïa kane namar ki don bynta ban pyntikna ba ka CAB kan long Aiñ ha Parliament,” ong u Nongai ktien ak Congress, Bah Ronnie V Lyngdoh haba kren bad ki lad pathai khubor ha Congress Bhavan. U ong ruh ba ki party riewlum ki la dei ban mih noh na ka sorkar MDA ha kato ka por lada dei shisha ba ki pyrshah ïa ka CAB da kaba buh hakhmat ïa ki paidbah bad ka jylla.
Utei u MLA barim ka Mylliem u la ong ruh ba ha u Nohprah 2019 baroh 60 ngut ki MLA ki la mynjur lang da ka Resolution pyrshah ïa ka CAB hynrei haba u Myntri Kampohiing ka Ri, u Amit Shah u la wanrah ïa ka CAB ha Parliament, ka MP jong ka NPP na Tura kaba dei ka para jong u Myntri Rangbha ka jylla, ka la ai ka jingkyrshan ba pura ïa ka CAB.
“Pynban hapdeng kine, ki party riewlum ki la sngap jar jar bad kim shym la buh jingkylli ïa u Conrad Sangma la katei ka jingkyrshan ba la ai da ka para jong u kadei da ka jingtip jong ka NPP. Kumta, ngi kwah ba ki paidbah kin tip ba lada ngi shah tyllep ha ka jaka lajong lashai lashisngi, dei ban kynnoh ïa ki party riewlum,” u la bynrap biang.
Nalorkata, u ong ruh ba lada baroh arngut ki MP ba ka Meghalaya ka don ki pyrshah ïa ka CAB, ka jylla lehse ka lah ban ujor pyrshah ïa katei ka Bill ha kiwei pat ki bor jong ka pyrthei.
Haba kren pat halor ka jingshah thombor ki kynhun niam bad rit paid, utei u nongïalam ka Congress u la ong ba ka NPP kadei shi bynta jong ka NDA ba ïalam da ka BJP katba ki party riewlum pat ki don ha ka North East Democratic Alliance (NEDA) kaba lamkhmat lang hi da ka BJP.
“Kim lah satia ban thet kti namar baroh san snem ki la treilang, mynta kin ym lah satia ban ong em namar ki la don bynta da kaba donlang ha ka sorkar MDA,” u la ong.
Halor ka jingkylli, u Bah Ronnie u la pynpaw ïa ka jingsngewskhem ba ki paidbah ka jylla kin kyntait beit ïa ka BJP namar bun ki kynhun niam bad ki rit paid ki la dep mad ïa ki jingeh. Da kaba ai nuksa ïa ka elekshon ha Gujarat bad Himachal Pradesh, u Bah Ronnie u la ong ruh ba ki nongthep vote na ki kynhun niam bad ki rit paid ki la kyntait ïa ka BJP namar ka rukom treikam jong ka.
U ong ruh ba ha Himachal Pradesh lei lei ka Congress ka la jop haduh 40 seat na ka 68 seat namarba ki paidbah ki la kyntait ïa ka BJP.
Tangba, u ong pat ba sngewsih ban ïohi ba ha Meghalaya, kijuh ki seng saiñpyrthei kiba kam ba ki ieid Jaidbynriew, ki donlang bad ka MDA kaba kyrshan da ka BJP.
Haba bynrap lang, u Myntri barim ka sorkar jylla, Bah JA Lyngdoh u la ong ba ki paidbah ka jylla kin sa ai ka jubab kaba tyngeh ha kane ka elekshon 2023 da kaba kyntait ïa ka sorkar MDA ba ïalam da ka NPP.
“Ki paidbah ka jylla kim kwah shuh ban ïohi ba kane ka sorkar MDA kan wan biang ha ka bor ha u 2023. Lada ki la ngiah ïa ka NPP, UDP bad BJP bad kiwei ki seng synrop lang, ka lynti kaba ki don kadei sa tang ka Congress,” u la ong.