Tura, Nohprah 17: Katba ka ileskhon sha ka Ïing Dorbar Thaw Aiñ ka jylla ka la nang jan nangjan la sakhi ruh ba ka jingrung jingmih ki nongïalam seng saiñ pyrthei ka la kynrei bha.
Ha ka sngi Saitjaiñ jan kumba 2000 ngut ki paidbah kiba kynthup ïa u nongïalam ka VPP na Garo Hills u Rocky Marak, ki, ki Nokmah, ki riew paidbah bad kumjuh ki nongtrei bad ki nongkit kam jong ka NPP ki la leit ban pynïasoh ïa lade sha ka BJP ha ka jingïalang kaba la long ha Resubelpara, North Garo Hills.
Ïa kane ka jingpynïasoh ka la sakhi lang da u nongïalam ka BJP na Assam uba dei u Media Convenor u Rupam Goswami, u National Council Member u Rikman Momin, u MLA barim ka NPP u Benedic R. Marak, u MDC ka South Tura uba dei ruh u State Vice President u Bernard Marak, u CEM barim ka GHADC u Dipul Marak, u MDC u Dharmonath Sangma bad kiwei de ki nongïalam.
U Goswami ha ka jingkren pdiang sngewbha jong u u la ong ba na ka liang ka BJP kan ym shong kli kti ban trei na bynta u paidbah bad ka bit ka biang jong u tang shu kut ka elekshon hadien ba ka BJP kan ïoh bat ïa u lakam synshar.
U la ong ruh ba ki paidbah ka Garo Hills kin ïohmad lem ïa ki kam pynroi kiba bun kiba ka sorkar BJP ka theh ha ki jylla ba ka synshar
U Bernard ha ka jingkren jong u u la ong ba ka BJP kumba ka thong jong ka ka dei ban ym aili ïa ka kam bamsap bad kan leh shisha ruh kumta ban pynthikna ba ki kam pynroi kiba dei ban poi sha u paidbah kan ym dei ban jah wat tang shisuka ruh.
