Nongpoh, Nohprah 15: Ka lad bad ka kabu ïa ki khun samla ban rung sha ka kam shipai lyngba ka Agniveer Recruitment Rally kala long shisha ka jingkyrkhu kaba khraw ïa ki khun samla jong ka jylla Meghalaya lyngba ka Agnipath Scheme ban long kum ki shipai bad nongïada ïa ka ri.
Ïa ka Agniveer Recruitment Rally la pynlong ha ka 10 bad 11 tarik mynta u bnai da ka REDHORNS Division jong ka Gajraj Corps bad ka Army Recruiting Office (ARO) Shillong bad kane ka dei ka sien ba nyngkong eh ba la pynlong kum katei ka rally pynrung kam shipai ba la sakhi ruh da ka jingwan shim bynta shitrhem jong ki khun samla bad napdeng 932 ngut ki kyrtong kiba aplai, 198 ngut ki kila shah jied ban leh ïa ka Physical bad Medical Test.
Ïa ka rukom jied la pynlong ha ka rukom kaba hok bad kaba shai, ban wad ïa ki briew kiba biang tam na ka bynta ka kynhun shipai jong ka ri. Ka Agniveer Recruitment Rally ha Umroi ka la long kaba jop bha, kaba pyni ruh ïa ka jingangnud kaba jur hapdeng ki samla ka jylla Meghalaya ban phong ïa ka uniform bad ban shakri ïa ka ri.
