New Delhi, Nohprah 15: Ka Reserved Bank ka Ri India (RBI) ha ka Sngi Saitjain ka la pynmih ïa ka jingpynbna ban kyrshan ïa ki nongrep ha kaba kala pynkiew ïa ka ram rep bad kiwei ki ba ïadei bad ka rep na ka 1.6- lak tyngka sha ka 2-Lak tyngka khlem da hap buh bynda ne don nongjamin.
Ka Jingshim ïa kane ka rai ka long namar kala don ka jingkiew dor ha ki mar ki matta kiba ïa dei bad ka rep, kane ka long ban ïarap ïa ki nongrep ban pynthikna ba ki don ïa ka lad ka lynti ban rep ban riang ha kaba ki lah ban shim ram khlem da buh bynda ne nongbah jamin.
Kane ka rai jong ka RBI kan trei kam naduh ka 01/Kyllalyngkot/2025, ki nongrep ki lah ban shim ram rep bad kiwei kiba ïadei bad ka rep haduh 2 lak tyngka u wei u nongrep, la bthah ban pyntrei kam ïa kine ki kyndon ba ki nongrep kin ïoh ha ka por ba biang katkum ka por rep.
La bthah ïa baroh ki Bank ba kin pynsaphriang ïa kane ka jingpyntip ban pynthikna ba ki paidbah kin tip bad ban pynlong ïa ka jingpynshai sha ki nongrep bad sha kito kiba don bynta ha ka rep ha ka jaka kaba ki bank ki treikam.
Kane ka rai ka long ban ïarap ïa ki nongrep kiba rit ki bym don lad ban ïoh jingïarap pisa bad ka jingweng noh ïa ka jingbuh bynda bad ban pynbeit ryntih ïa ka rukom airam bad kane kan ïarap ban kyntiew ïa ka jingpyndon kam ïa ka Kisan Credit Loan (KCC).
Kane kan ïarap ïa ki nongrep ban pynkhlaiñ ïa ka rep bad kan kyntiew ïa ka ïoh ka kot ka jong ki, haba khein lang bad ka sut kaba ka sorkar kan ïarap ba ïa ka ram haduh 3- lak tyngka ka sut kan long tang 4% kane kan ïarap ïa ki nongrep bad kan kyntiew ia ka rep ka riang ha ka ri baroh kawei.
