Boko, Nohprah 15: Arngut ki briew ki la khlad hashen hadien ba ka la don ka jingjia aksident kaba la jia hapoh ka shnong Paneri kaba dang hab hapoh ka Boko Police Station bad kane ka la jia ha ka janmied jong ka sngi u blei.
Kitei ki lanot kiba la ngat ha kane ka jingjia kaba sngewsih la ithuh kyrteng da u Therang Sangma bad Ishak Sangma, ha kaba uwei u dei u mama bad uwei pat dei u pyrsa kiba trei hapoh kawei ka karkhana kaba hapoh ka Chaygaon Industrial Growth Centre.
Katkum ki tyllong khubor ba la ïoh na ki pulit la ïathuh ba baroh arngut ki dei kiba na Mendipathar kaba ha North Garo Hills district. La ong ruh ba kine ki arngut ki dang wanphai na ka jaka ba ki la phah maramot ïa ka thuk thuk jong ki, ha kaba ka trok kaba don u nombar WB 59 D 1465 ka la tynrah ïa ki.
Ki pulit ka Boko ki la poi ha ka jaka bad ki la lap ïa ka met jong ki bad kumjuh ruh ki la kurup noh ïa katei ka trok. Na ka liang ki pulit ka Boko kin saphah ïa ka met jong kitei ki arngut sha Guwahati Medical College Hospital na ka bynta ban pyndep ïa ka postmortem ka ban long ha ka sngi Nyngkong.
