Shillong Nohprah 15: Ka seng Hynñiewtrep Ïewduh Association ka la wengnoh ïa arngut ki dkhot jong ka hadien ba ki la shah kynnoh ba ki la shim pisa na ki nongpynïaleh khalai khruk khruk ne housie hapoh basa Tympew.
Ïa kane la ïathuh da ka Vice President ka seng ka Kong Victoria Marweiñ ha ka jingdonlang u President u Bah Korbar Lyngdoh Nonglait haba ïakren bad ki lad pathai khubor.
“Ngi kwah ban pynpaw paidbah ïa ka jingleh ki dkhot jong ngi, namarba ka seng HIA kaba ju ïatreilang bad ka HYC ban ratdiengkhong ïa ki kam sniew hapoh Ïewduh khamtam kane ka jingpynlong ïa ka khalai housie, hynrei kine ki dkhot jong ngi ki la shim kabu ïa kane ka jinglui lui ka jong ngi, ki la phla ba ki la leit shim pisa na ki, kumta kine ki la pynthohbria ïa ka seng jong ngi, kumta hadien ba ngi la ïamir jingmut lang jong baroh ki dkhot, ngi la rai ban wengnoh ïa ki na ka jinglong dkhot bad kim dei ban don bynta shuh bad ka seng nangne shakhmat,” ong ka Vice President.
Ka la ong ba kam shym la poi pyrkhat ba kine ki arngut ki dkhot ka seng ba kin leit dawa bad shim pisa napoh ki jaka ïalehkhalai bad na ki nong pynïakhlai, kumta ka seng ka da sngewkhia shibun halor kane ka jingleh ki arngut ki dkhot.
“Donbok ba ka seng HYC ka lap ïa kane bad ka la pyntip sha ngi, ngi da ai burom shisha ïa ka HYC ba kum kata ka seng kaba tur shakhmat ban shakri na ka bynta ka bha ka miat ka imlang sahlang,” ong ka Kong Marweiñ.
Ka la ong ba ïa kane ka jingleh ki dkhot ka seng la pyntip da ka HYC ha kine ki taïew ba lah dep bad kum ka seng HIA kaba ju ïatreilang bad ka HYC ka sngewkhia halor kane ka jingjia.
“Ka riti synshar jong ka seng ka ong ba lada lap ïa kino kino ki dkhot kiba leh ki kam bym dei khamtam kiba pynthohbria ïa ka seng, ka seng kan weng shi syndon na ka jinglong dkhot ka jong ki, watba ki la phla ba ki shim tang kyndiat hynrei na ka liang ka seng kan ym mab satia la kadei khyndiat ne shibun, namar ngi la dep ban mana lypa ïa ki, kumta ka seng ka rai ban wengnoh ïa ki,” ong ka nongïalam ka seng HIA.
Haba ïathuh ba hadien ba ka seng HIA bad ka HYC ki la pynlong ïa ka jingleit khynra manla ka por haba ïadei bad kane ka jingpynïakhalai housie kaba la jur bha hapoh Ïewduh ha ki katto katne ki dukan, hynrei mynta ki la duna.
“Hynrei suki suki kane ka la sdang biang bad kine ki dkhot jong ngi haba ki shah tyrwa pisa lehse ha ka por ba kin ïoh ban pynïakhalai biang, ki dkhot jong ngi ruh ki shim ïa kata ka pisa bad kumta kine ki dkhot kim dei ban don bynta shuh bad ka seng nangne shakhmat,” ong ka Kong Marweiñ.
Haba kylli ïa ki sienjam ba ka seng kan leh ban ratdiengkhong ïa kine ki kam khalai bad kiwei pat ki kam sniew ha Ïewduh, ka nongïalam ka seng HIA ka la ong ba ka seng kam sngewtynnad shisha ban ïohi ïa ka jingjyllei ka kam khalai housie hapoh ïew.
“Kum ka seng ngi pyrshah ïa kane ka jingïakhalai hapoh Ïewduh, namarba ym dei tangba ki shu khalai ba ki ïoh pisa maki kumto, hynrei ka jingjot jingpra ka ïew, ka jingkhlem raiñ bad ki jingjaboh ba laiphew jait ki wan bad kiba ïa khalai ruh kim dei tang ki shynrang, hynrei naduh ki kynthei ki khynnah ruh ki ïa khalai lang bad kane ka long kaei kaei kaba sngewsih bad kaba pynjot ïa ka jaitbynriew ka jong ngi, kumta ngin ym ailad ïa kane bad lada ngi ïoh bad ïohi ngin bat beit ïa ki,” ong ka seng HIA.
