Shillong, Naiwieng 04 : Ka jingpynheh ïa ka Shillong Airport la khmih lynti ba kan dep hapoh ka 18 bnai na ka sngi ba aiti ïa ka work order, ong u Symbud Myntri Rangbah Ma Sniawbhalang Dhar ha ka sngi Ba-ar.
Ka jingkhot tender ka dang ïaid shakhmat bad ka Airport Authority of India kan dang ban aiti ïa ka kam ban pyntrei.
U Ma Sniawbha ula ïathuh ba ka Sorkar Jylla kam pat aiti satia ïa ka jaka ban pynheh ïa kane ka kad hynrei baroh kiei kiei kila ïaid ha ka lynti kaba dei. Ula kyrpad ïa ka AAI ba kan pynsted noh ïa ka kam namar ka Agency ba pyntrei kam dei satia na ka Sorkar Jylla.
Haba ïadei bad ka Baljek Airport, u Ma Sniawbha ula ïathuh ba ka Sorkar Jylla kala kyrpad ïa ka AAI ba kan pynlong ïa ka jingjurip ban ithuh bad ïoh jingkheiñ ïa ka jaka ba donkam ban pynheh ïa ka kad Liengsuiñ. Ka Sorkar ka dang ap ïa ka jubab na ka AAI.
Halor ka jingdawa ban wan pynhiar ïa ki liengsuiñ kiba kham bha ha Baljek Airport, u Ma Sniawbha ula ong ba ka kam ba hakhmat eh ka dei ban pynkhreh shuwa ïa ka Airport bad yn sa ïakren ïa kane ka kam.
Ka Sorkar Jylla kala ïasoi ïa ka soskular ban aiti ïa ka Airport sha ka Airport Authority of India.
