14 tarik bad 15 tarik yn pynlong biang ïa ka 7th Amur Falcon Festival

Nongpoh, Naiwieng 12: Ka Tyrso Valley Wildlife Protection Society ryngkat kiwei kiwei ki kynhun kiba don haka thaiñ Tyrso kumba ju leh man la u snem kala rai ban pynlong biang ïaka tamasa Amur Falcon Festival 2023 haka sien kaba 7 hadien ba da ki lak tylli ki sim kbeit (Amur Falcon) kila wan ban iuhkjat biang ha katei ka thaiñ shisien shisnem.
Ïa katei ka tamasa yn pynlong 2 sngi lynter naduh ka 14 bad 15 tarik mynta u bnai haka shnong Tyrso.
Haba phah ïaka kyrwoh naka liang u Bah Alos Nongpoh Secretary ka TVWPS u la ong baka jingthmu jong katei ka tamasa ka long ban pynneh pynsah ïaki sawdong sawkun ka mei mariang ha katei ka thaiñ naduh ki mrad ki mreng, ki sim ki doh, ki dohkha ki dohpnat bad kiwei kiwei khamtam ba ki paidbah ki dei ban kiar ban pyniap ïa kitei ki jait sim kiba wan shong tang shipor shuwa ba kin leit phai biang sha kiwei kiwei ki jaka.
U la ong ruh ba ka thaiñ Tyrso, Umru ka long kaba donbok bha namar ka jingwan buhai shnong shisien shisnem jong ki jait sim Amur Falcon kiba ju wan da ka kynhun ban wan dem ha katei ka thaiñ bad lyngba ka jingtrei shitom jong ka seng treimon sngewbha ka TVWPS ha ryngkat ka jingtreilang jong ki paidbah ka thaiñ Tryso hi baroh kawei ba kynthup ïa 15 tylli ki shnong la lah ban ïada ïa kitei ki sim, ha kaba ki paidbah kim pyniap ne bamdoh shuh ïaki naduh u snem 2015 kat haduh mynta.
“Kane ka thaiñ kala sdang ban pawnam naduh ka jingwan jong kine ki sim bad kum ka kynhun TVWPS ryngkat ki Rangbah Shnong bad ki seng bapher bapher ki angnud ban ithuh noh nangne shakhmat ïa katei ka thaiñ kum ka Tourism Area bad kwah ruh ba katei ka thaiñ kan rung ruh haka map Tourism jong ka jylla ba kin sa pynpaw ruh hakhmat ki Myntri sorkar ba dei peit” la ong u Bah Alos da kaba bynrap ruh ba kine ki jait sim sa tang katto katne sngi kin sa leit phai noh namar ki sdang ban poi naduh u bnai Risaw.
Shuh shuh u la ong ruh ba kum ka kynhun TVWPS ka kwah ba ka tnad jngohkai jong ka jylla kan pynrung bad ithuh ruh ïaka Amur Falcon Festival kum ka State Festival bala donkam ruh ïaka sorkar ban buh ïaki jaka sah jong ki nongwan peit kai lane ki tourist kiba na kiwei ki jaka khamtam kiba nabar jylla namar kumba long mynta ki nongjngohkai pyrthei na kylleng ki jaka ki wan ban tuid ban peit ïa kitei ki sim.
Ha kaba ïadei bad ka jingmyntoi ka jingwan jong kitei ki sim naka liang u Bah Alos Nongpoh u la ïathuh ba kine ki sim ki ïarap shibun ïaki nongrep ha kane ka thaiñ wat sha kiwei ruh ki thaiñ jong ka jylla namar kine ki sim ym dei tang ba ki bam kber hynrei ki bam ruh ïaki jait khñiang bapher bapher kiba her ha suiñ bad ruh kiba pynjot ïaki jingthung jingtep bala long shisha ka jingkyrkhu ïaki nongrep bad naka liang ki paidbah ha katei ka thaiñ kila shim rai ruh ba kim dei ban pyniap lane dusmon ïaki bad kine kino kiba pynïap ïaki kin ngat haki aiñ bala buh kyndon da ki shnong lane haka tnad Wildlife.
Kumta naka liang ka Tyrso Valley Wildlife Protection Society ka khot bad wer ïaki paidbah ban wan sakhi ïa katei ka tamasa bad kumjuh ruh ban sakhi dala ki jong ki khmat ïa kitei ki jait sim kiba wan ban dem ha katei ka thaiñ, u la bynrap.