135th Durand Cup: Yn sdang ka Group E da ka jingïakhun hapdeng ka Lajong pyrshah ïa ka Nongkseh

Shillong, Naitung 03: Ka Shillong Lajong FC bad ka Nongkseh SSCC kin ïakhun pyrshah ha ka jingïalehkai ba nyngkong jong ka Group E ha ka lympung Durand Cup 2026.
ïa kane la pynthikna hadien ba ki nongpynïaid ki la pynbna ïa ka prokram ïalehkai jong baroh ki Group hynne ka sngi Thohdieng.
Ki jingïalehkai jong ka Group E la buh ban pynlong ha JN Stadium ha Polo, bad ka jingïalehkai ba nyngkong kan long ha ka 31 tarik Naitung.
Nalor ka Lajong bad ka Nongkseh, kiwei pat ki kynhun ba shah kynthup ha kane ka Group ki long ka Langsning FC, kaba dei ruh kawei na ki klob trai ri jong ka jylla Meghalaya. nangta ka Mumbay FC kaba na Maharashtra.
Ha kawei pat ka liang, ka NorthEast United FC kaba bat ïa ka nam lahduh, kan ïakhun ïa ki jingïalehkai jong ka ha Guwahati na ka Group F.
Ki kynhun kiba don ryngkat ka NEUFC ki kynthup ïa ka Bodoland FC, FC1 bad ka Karbi Anglong Morning Star FC. Ka jingïalehkai ha Guwahati kan sdang naduh ka 01 tarik Nailar ha kaba ka NorthEast United kan ïakhun pyrshah ïa ka Bodoland FC.
Hadien ka jingpynkut ïa ki jingïalehkai league stage, ki hynriew tylli ki kynhun ba wan hakhmat duh na kawei pa kawei ka group bad ar tylli ki kynhun kyrdan ba ar kiba kham kynsai kin jam shakhmat sha ka wat ïakhun knockout.
Ka Quarterfinal kan long ha ka 16 tarik Nailar ha kaba ka jingïalehkai ba nyngkong kan long ha Ranchi bad kaba ar ha Kolkata, shuwa ba ki ar tylli ki jingïakhun QF ba dang sah kin pyndep ha ka 17 tarik Nailar ha nongbah Kolkata bad Shillong.
Ka jingïakhun Semifinal ba nyngkong kan long ha Vivekananda Yuba Bharati Krirangan ha Kolkata ha ka 19 tarik Nailar, katba ka Shillong kan pynlong ïa ka semi final kaba ar ha ka 20 tarik Nailar.
Kane ka lympung kan kut noh da ka jingïakhun phainal ha Vivekananda Yuba Bharati Krirangan ha Kolkata ha ka 23 tarik Nailar ha kaba ka lahduh jong ka 135th Durand Cup kan ïohpdiang ïa ka khusnam.