13 tylli ki rot pynpoi ha pung ka ‘Syiem Aitnar’

Jowai, Naitung, 09: Ka Shad ñiam Behdieñkhlam kaba ju long shisien shisnem jong ka Seiñ Raij Jowai mynta ka sngi (Muchai) ka la poi noh sha kaba kut hapdeng ka jingiphuh iphieng ba la shim bynta ki khun ka Seiñ Raij Jowai ha ryngkat ka shad ka kmen bad ka put ka tem.
Ïa kane ka shad ñiam Behdieñkhlam kaba ki khot ka ‘saw sngi lai miet’ ka la sdang naduh ka 6 tarik bad pynkut mynta ka sngi Muchai 9 tarik u Naitung, 2023 ha kaba la pyndep ïa ki jinglehñiam naduh ka nguh ka dem, ka suit ka shor, ka jingpyndep ïa ka Siang ka Pha, ka jingleit rah ïa ka Symbood Khnong, ka Khnong Blai, ki Deiñkhlam, ka bam tyngkong, bad kiwei de ki kam ñiam kam rukom ba la pyndep da u Dolloi ka Elaka Jowai, u Langdoh, u Pator bad ki Waheh Wasan.
Baroh ki Rot kiba la wan pynpoi mynta ka sngi kut hapoh ka Syiem Aitnar ki la don haduh 13 tylli, ïa kiba la shna kyrpang da ki dong bapher bapher hapoh ka Raij Jowai kumjuh na ka Seiñ Ummulong, ka seng Khasi Seng Kmie. Kine ki rot ki la ai ka khubor ban ïada ïa ka mei mariang ban lait na ki jingjaboh, ka jingngop ha ka jingpyndonkam palat ïa ka Mobile Phone, ki jingdih ba sniew, ka jingpang HIV AIDS bad kiwei de ki khubor jingsneng jingkyntu ïa ka imlang ka sahlang.
Ha kane ka sngi pynkut ïa ka Behdieñkhlam la wan ban sakhi lang da u Lat ka jylla u Phagu Chauhan, u Chief Justice ka Meghalaya High Court u Sanjib Banerjee, u Myntri ka tnad Revenue & Disaster Management Department ma Kyrmen Shylla, u bah Adelbert Nongrum MLA kiba la ai ruh ka jingkren ha kane ka sngi bad ai khublei Behdienkhlam. Kiwei de kiba ïadon lang ki long u Deputy Commissioner ka WJHD bah B.S. Sohliya, u SP ma C. Syrti, ki ophisar sorkar nalor ka jingdonlang u President ka Seiñraij ma O. R. Shallam, General Secretary ma A. Sumer nalor kiwei de.
Na ka liang ki nongïalam ka Seiñraij Jowai ki la pynpaw ka jingsngewnguh ïa baroh kiba don bynta ha kane ka lehñiam naduh basdang jong ka tad haduh bakut jong kane ka sngi, ha kaba la lah ban pyndep ïa ki ñiam ki dustur jong u longshwa manshwa. Ha kane ka lehñiam la ïatreilang bad ka North Eastern Council (NEC) Shillong, ka tnad Tourism, ka Planning bad ka Art and Culture ka jylla.
Haba phai sha ka lehñiam ba khadduh jong kane ka Behdieñkhlam mynta u snem naduh ka por mynstep ka la don ka Bam Tyngkong ha ïing Langdoh, ka kynting khnong ka Loompyrdi ha ïung Langdoh, ka Sympat ïung, katba haka por nongphai sngi kaba dei ka bynta ba kongsan jong ka lehñiam la pynhiar ïa ka Deiñkhlam, ka Kymbood Khnong, ka Khnong Blai bad ki rong ki rup kiba don 13 tylli la pynpoi ha pung ka Syiem Aitnar da ka jingsakhi lang jong ki hajar ngut ki nongwan peitkai kiba dei na kylleng ka Ri Khasi Jaiñtia.
Katba ha ka por janmiet la don ka Datlawakor hapdeng u Langdoh bad u Sangot Paswet ha ka jingïaleh ka kynhun u Langdoh ka la long ka nongjop kaba mut ba u kba u khaw un khambha sha ka thaiñ pynthor Wah mynta ka snem.
Na ka liang u President ka Seiñ Raij ma O.R Shallam ula ai khublei kyrpang ïa baroh kiba ïadon bynta lang ha kane ka lehñiam Behdieñkhlam mynta ka snem 2023, u kyrmen skhem ba jingpyndep ïa ka lehñiam Behdieñkhlam ka dei kawei na ki bynta ban beh ïa ka pang ka shitom, ka bamsap bampong, kan ïada ïa ki khun samla na ka jingdih pynbuaid kum u Drug, ka kyiad, ban ïada na ka jingshah thombor ki kynthei khynnah bad kan wanrah syndon ïa ka bha ka miat, ka roi ka par ha ka ïing ka sem, ka shnong ka thaw bad ka ri hi baroh kawei lyngba ka jingkyrkhu kyrdoh u ‘Tre ki rot’.
Ha ka juh ka por u kyntu ba ym dei ban don kano kano ka jingsngewpher ha ka ñiam ka rukom bad kum ki para briew dei ban burom kylliang, da kaba u ai khublei ruh ïa ki tnad sorkar kiba la pynïaid beit pynïaid ryntih ïa kane ka Behdeiñkhlam mynta ka snem.