Pynbthei ki bor synshar ka West Khasi Hills ïa ka karkhana saiñ dewïong be-aiñ ha Shallang
Nongstoiñ, Naitung, 9: Ha ka sngi saitjaiñ ki bor District jong ka West Khasi Hills, ki la leit ban pynbthei pynpra syndon phom ïa kawei na ki karkhana saiñ dewïong beaiñ kaba don ha Shallang. Ka khubor ba ha kine ki khyndiat sngi khyndiat taiew, yn sa nang pynpra ruh sa ïa kiwei kiwei ki karkhana saiñ dewïong beaiñ ha Shallang.
Kane ka jingjia ka la jia long ruh tang katto katne por hadien ba ki bor District ki la ïoh kem ïa ki san ngut ki trai jong kine ki karkhana saiñ dewïong beaiñ. Lah ban pynkynmaw ba kine ki san ngut ki kynthup ïa u Youdishtra Bhama khun jong u briew ba la ithuh kum ka ‘Mafia’ khaïi dewïong beaiñ ba kyrteng u Balwant Bhama, u ba dei ruh u trai jong ka M/s Kalyani Fuel Limited, ka karkhana saiñ dewïong ba beaiñ ha Shallang.
Ki saw ngut kiwei pat ki dei u Hopeful Nongtdu ba na Rymbai Synrang Shahkhaiñ, East Jaiñtia Hills, u Khrawbok Rongrin ba na Sohbar A, Shallang, u Ashish Arya ba na Basisthapur Bye-Lane, Guwahati, Kamrup bad u Yaman Bansal ba na Beltola Tiniali Guwahati, Kamrup. Na kine ki 4 ngut ba dang shu shah kem, u Hopeful Nongtdu u dei jong ka M/s HV Coke Limited bad ki lai ngut kiwei pat ki dei jong ka M/S Yash Coke Limited.
Ki bor District ki pyntip ba ki don haduh 61 tylli ki karkhana saiñ dewïong beaiñ ha ki thaiñ Shallang West Khasi Hills. Napdeng kine, tang 4 tylli ki dei kiba don ïa ki kot ki sla kiba biang ban treikam katba kiwei kiwei ki dei kiba shu treikam beaiñ. Ki la pyntip ba bun na kine ki karkhana beaiñ la khang khyrdep lut mynta bad ka jingthwet ïa ki trai ka dang ïaid shakhmat.
Lah ban kdew hangne ba ka Ïingkashari Meghalaya High Court, ka la kynther tyngeh ïa ka Sorkar Jylla bad ïa ki bor Sorkar, halor ka jingkheiñ sting ban leh eiei pyrshah ïa ki karkhana saiñ dewïong ba beaiñ bad kumjuh ruh ïa ka jingkhaïi tuh ïa u dewïong.
Dang ha ka 6 tarik Jylliew mynta u snem, ka Ïingkashari ka la suba jur ba dei ki briew na Assam kiba pynïaid ïa ki kam tih dewïong beaiñ bad seng karkhana saiñ dewïong beaiñ ha Jylla Meghalaya. Kane ka jingsuba ka la mih hadien ba u Nongai mukotduma u Shailendra Kumar Sharma, u la aiti ha ka affidavit ba file ha ka 5 tarik Naitung, ïa ka thup kyrteng bad phone numbor jong baroh ki briew, kiba u ong ba ki dei ki ‘Kingpin’ ba donkam ban seng karkhana saiñ dewïong beaiñ bad tih dewïong beaiñ ha Jylla Meghalaya.
Katkum ka jingong ka Ïingkashari, kum kine ki kam beaiñ la I kumba ki dei kiba pynïaid da ki briew na Assam. U Shailendra Kumar Sharma u la aiti ïa ka jingujor hapoh ka Basistha Police Station, Guwahati ha ka 30 tarik Jylliew, ba don uwei u briew ba kyrteng u Balwant Bhama, u ‘Kingpin” ha ka jingpynïaid beaiñ ïa ki karkhana saiñ dewïong ha Meghalaya, u ba la phone ïa u haduh ar sien ha ka step 30 tarik Jylliew bad wan kynduh ruh mar met sha ka Ïing sah ha kane ka step, ban byrngem byrsit ïa u nongmudui lada u dang ïai bteng ïa ka jingïakhun mukotduma.
Kumjuh ruh, u Advocate General ka Jylla ruh u la kdew ïa ka kaiphod kaba 3 tarik Naitung ba la file da u Director General of Police (DGP) ka Jylla Meghalaya, ba u Youdishthra Bhaman, u ba dei u trai jong ka M/S Kalyani Fuel Limited Shallang, u dei u khun jong u Balwant Bhama, ïa u ba u nongmudui mukotduma u la ujor pyrshah.