Ym pyrshah u MP lada wan ka lynti rel sha East Jaintia Hills

Shillong, Naitung 09 : U President ka Congress ha ka Jylla ba dei ruh u MP ka Shillong seat, Bah Vincent H Pala u la ong ba um don satia kano kano ka jingpyrshah ïa ka jingthmu jong ka sorkar jylal ban wanrah noh da ka lynti rel sha Khliehriat, ha East Jaintia Hills.
“Nga ïalade shimet ngam don jingeh ne pyrshah ïa ka lynti rel ban wan sha kane ka thaiñ, u la ong.
Utei u MP u la ong ruh ba ym don satia mano mano kiba lah ban khang ïa ki paidbah ban wan sha ka jylla. “Ki lah ban wan da ka bos, ka liengsuin, da ka trok bad kiwei kiwei,” u la ong.
Haba kren pat halor ka jingpyrshah jong ki sengbhalang ïa ka lynti rel ba ka dei kawei naki daw ban wanrah ïa ka jingwan kyrthlep ki mynder, u Bah Pala u la ong, “Ngam tharai ba kata kadei ka jingshisha namar lada ki wan, ki lah ban wan da ki trok, da ki bos.”
Shuh shuh u ong ruh ba ïa ka jingwan kyrthlep ki mynder lah ban pynsangeh tang ha ki shnong ki thaw bad kam dei satia da ki khyrdop talasi ha ki rud surok. “Lada ki shnong, ki nongïalam shnong bad baroh ki treilang tang katta ym don shuh kano kano ka jingeh ba ïadei bad ka jingwan ki mynder,” u la ong.
Halor ka jingkylli la ka sorkar kan pyntreikam ïa ka Inner Line Permit ban weng ïa ka jingtieng ïa ka jingwan ki mynder lyngba ki rel, utei u heh Congress u la ong ba ka sorkar pdeng ka la dep kren shai ba ka Meghalaya ka hap ban jied kawei, kata ka Khyrnit kaba Hynriew ne ka ILP.
Lah ban kdew hangne ba u Myntri Rangbah ha ka 06tarik mynta u bnai u la pyntip ba ka don ka jingpeit bniah ban pynpoi noh da ka lynti rel ha ki thain Khliehriat, East Jaintia Hills District.
Kane ka la jia hadien ba ka jingthmu ban pynpoi lynti rel ha Khasi Hills ka la mad ïa ka jingpyrshah kaba jur na ki seng bapher bapher halor ka jingtieng ïa ka jingwan kyrthlep ki mynder.