Nongpoh, Nailar 27: Ka kynhun ki nongñiah auto kamai ha Nongpoh hapoh ka lama ka Nongpoh Region Auto Owners and Drivers Association (NRAO&DA) kiba don ruh kumba 6 tylli ki Unit ba kynthup ïa Nongpoh, Saiden, Pahamri-oh, Shangbangla, Umsaw Nongkharai bad Marngar Unit mynta ka sngi da ka jingbitar kila lum da ka jingïalang halor ka jingioh thiah lyngngai u President ka Association khlem pynlong meeting bad khlem lah ban ai jingkheiñ mynta la kumba 13 snem eiei hynrei man la ka sngi la shu lum pisa naki nongñiah auto kamai ha Nongpoh.
Haba kren sha ki lad pathai khubor naka liang ki nongñiah auto kamai na kitei ki 6 tylli ki Unit kila pynpaw ba ki sah haka um dum halor ka jingtreikam jong u Bah Markus Marten President ka NRAO&DA wat hadien ba ki nongñiah auto kila dawa ba dei ban pynlong meeting bad ban ai jingkheiñ ïaka pisa bala ioh lum hynrei la shu sngap man man bad jah klep khlem da sngap eiei ïaka jingdawa ki nongñiah auto wat hadien ba kila dep ban ai por 15 sngi ban pynlong meeting bad pynshai hakhmat ki nongñiah auto.
Ki la ong ruh hadien ka jingbym kheiñ snep eiei halor ka jingdawa ki nongñiah auto bad ka jingioh thiah lyngngai jong u President naka liang ki nongñiah auto kila phah da ka shithi haka 9 tarik mynta u bnai sha u President ka NRAO&DA sengkmie ban dawa pynlong jingïalang namar man ka sngi la khrong 10 tyngka na kawei ka auto bad kum ki nongñiah ki kwah ban tip ïaka jingkheiñ bad katno ka pisa kala poi.
Ki la pynpaw ruh ba ki don kumba 300 tylli eiei ki auto kamai ha kine ki 6 tylli ki Unit ba hap hapoh ka NRAO&DA bad lada kheiñ ka jingioh lum baroh ka long T.3000/- haka shi sngi bad T.700000/- haka shisnem bad haba kheiñ ha kine ki 13 snem kynthih ka jingkhrong pisa kala poi palat ïaka 1 klur.
Kaba la pynsngew bitar shuh shuh ïaki nongñiaah auto ka long ba wat hadien ba kila dep ban phah da ka shithi sha u Bah Marcus Marten kum u President, utei u nongïalam u la phah pynshai pynban mynno ki nongïalam ki iohthiah.
Lada 13 snem kynthih kam don satia ka jingïalang, kam don satia ka jingai jingkheiñ jingdiah kaba pura wat hadien bala khrong 10 tyngka man ka sngi naki nongñiah auto hato kata kam dei ka jingioh thiah? La buh jingkylli ki nongñiah auto bad kum ki nongñiah auto ki don hok ban tip katno ka pisa bala ioh lum ka por bad shaei ka don kata ka pisa ne ka leit sha ka pla jongno jongno.
Namakata naka liang ki nongñiah auto kila ai por 5 sngi ïa u Bah Marcus Marten bad ki nongïalam ka NRAO&DA ba kidei ban khot da ka jingïalang (General Executive Council) ha kano ka jaka ba ki sngewbit ban pynshai bad kum ki nongñiah auto ki kwah ïaka jingpynthymmai ïaki nongkitkam naka bynta ka bha ka miat jong ki para nongñiah auto bad ban ai ka jingkheiñ jingdiah ïaka pisa bala ioh lum baroh ha kine ki 13 snem ba khlem lah ban pynlong meeting.
