Nongpoh, Nailar 27: Kum uwei na u rangbah ka jylla uba la noh synniang bha shibun eh na ka bynta ban kyntiew ïa ka put ka tem bad ka rwai ka siaw bad ba la tip paidbah ruh kum u ta u Bob Dylan ha ka ri hi baroh kawei, u Bah Lou Majaw mynta ka sngi u la shah pynkup burom da ka kyrdan Doctor of Literature ha ka 10th Convocation ka skulbah USTM ha Ri Bhoi.
Ha kane ka sngi ki nongrwai ba paw ba kynthup ïa u Bah Lou Majaw bad u Zubeen Garg kum ki nongrwai ki la shah pynkup burom ïa kajuh ka kyrdan doctor of Literature bad ha kane ka sngi la pynkup burom ruh ïa ki hajar ngut ki samla pule kiba la pyndep ïa ka Graduation, Post Graduate bad kynthup ruh kiba la pyndep ïa ka kyrdan Ph.D na katei ka skulbah USTM.
Related Posts
Ha kane ka sngi, la don ryngkat ruh u Chancellor ka USTM, U M. Hogue bad kynthup ki professor bad ki samla pule katei ka skulbah ha kaba kane ka jingpynkup burom ba la tip kum ka 10th Convocation ka la long kaba jop.
Haba pynpaw hadien ba la ioh pdiang ïa kane ka kyrdan doctor literature, u Bah Lou Majaw u la pynpaw ïa ka jingkmen kaba khraw ba ka skulbah USTM ka la ai ïa kane ka burom bad kum u nongrwai ba la paw ha ka jylla bad ka ri u la ban khia ruh ban jop ha ka lynti jong ka jingim, ngi donkam ban don ïa ka akor ka burom.
Shuh shuh, u la ban khia ruh ha ka jingim briew ngi donkam ban tip ïa ka jingmut jong ki ar tylli ki kyntien, kata ka kyntien adkar bad lyngkar, lada kino kino kiba kwah ban jop ha ka jingim ki dei ban long adkar ïa ka la ka jingim bad kiba ym lah ban long adkar pat ka mih katei ka kyntien lyngkar bad haba lyngkar ngin nym lah ban poi sha kata ka thong kaba ngi angnud, u la bynrap.