Lyngba ka Public Hearing, kwah ki paidbah Maweit ban sdang biang ka jingtih dewïong

Nongstoiñ, Nailar 27: Ki paidbah jong ka thaiñ Maweit ryngkat ki nongïalam shnong, ki sengbhalang bad ki khun samla jong ka thaiñ, ki la tylli kawei ka sur ban ai jingkyrshan ïa ka Environmental Public Hearing ba la pynlong ha Sdad Dkhar, West Khasi Hills District, shwa ban sdang noh ïa ka jingtih dewiong kaba long katkum ka juk stad saïan lane ka scientific Mining na ka bynta ka Pyndengshahlang Coal Block ka ban pyntrei da u Bah Shiningstar Khardewsaw kum u trai jong katei ka project.

Ïa katei ka Public Hearing ba la khot pynlong da ki Meghalaya State Pollution Control Board hynne ka sngi ha Sdad Dkhar, ha kaba la pynïaid ïa ka jingïalang da u Bah M.A Challam, Additional DC ka WKH ha ryngkat ka jingïadonlang u Bah Y.F Laloo, Environmental Engineer, Meghalaya State Pollution Control Board, Dr. G. H Chyrmang, MFS, Member Secretary, MSPCB, u Bah S. Syiem, Environmental Engineer, MSPCB bad kiwei kiwei.

Ha kane ka sngi la sakhi ba ki paidbah jong ka thaiñ Maweit bad ki shnong ba marjan, ki nongïalam shnong, ki nongïalam sengbhalang, ki rangbah kur, ki khun samla jong ka thaiñ ki la pyni da ka mynsiem ba sngewkhia ban ai jingkyrshan ïa katei ka jingpynsngew paidbah, khnang ban ïoh sdang biang ïa ka kam tih dewiong kaba la shah khang mynta la palat 10 snem ha ka National Green Tribunal (NGT).

Ki nongkren kiba dei ki trai shnong na katei ka thaiñ, ki la pynsngew ruh ïa ki jingeh ba ki paidbah nongshong shnong ki la mad baroh shikatta, naduh ba la shah khang tih dewiong, ha kaba kane ka la ktah syndon ïa u khiew ja jong ki. Ka la ktah ruh ïa ka pule dangle jong ki khun ki kti, namar ki kmie ki kpa kim lah shuh ban kyrshan ïa ki, ba kin dang bteng ïa ki jingpule ha ki kyrdan ba kham shajrong.

Haba ïohi ïa ka jingeh ba ki paidbah ki la mad baroh shikatta na ka jinghiran ka ïoh ka kot, na ka liang ki sengbhalang bapher bapher, ki nongsynshar shnong, ki khun samla bad ki paidbah jong katei ka dong ka thaiñ ruh ki la ieng tylli mlon kawei ban pyni ba ki kwah ban sdang biang ïa ka kam tih dewiong hapoh ka thaiñ.