12 tarik Jymmang yn sdang ka MSL 2023, ka Niaw Wasa United pyrshah ïa ka Rangdajied United FC

Shillong, Jymmang 10 : Ka lympung ïalehkai phutbol Meghalaya State League 2023 kaba lai, ka sah mynta satang shi sngi shuwa ba ki paidbah riew ieit phutbol kin sa ïoh ban peit bad ban sakhi ïa ki rangïalehkai kiban sa pynpaw ïa la ki jong ki sap ïalehkai na ka bynta ban ïarap ïa la ki jong ki kynhun sha ka thong jong ka jingjop.
Katei ka lympung kan sdang ha ka 12 tarik mynta u bnai Jymmang 2023 ha Kiang Nangbah Stadium ha Jowai, ha kaba ka Niaw Wasa United kaba dei ka kynhun ba ïoh rah nam lahduh ba nyngkong eh jong ka MSL kan aireng pyrshah ïa ka kynhun kaba wan ba ar (runners-up) ha u snem 2019 ka Rangdajied United FC kaba dei ruh ha la ïing na ka bynta ka Niaw Wasa United kaba dei jong ka Jowai Zone.
Ïa katei ka lympung ïalehkai phutbol ba mynta u snem yn plie pyrda da u Bah Shakliar Warjri uba dei u Myntri jong ka tnad ki kam ïalehkai jong ka Sorkar Jylla kum u Kongsan ha kaba yn sa ïadonlang ruh u Bah Wailadmiki Shylla MLA ka Jowai kum u special guest.
Ka jingïalehkai ha katei ka sngi kan long ha ka por 3 baje janmiet. Shuwa ban sdang ka jingïalehkai na ka liang ki nongpynïaid jong katei ka lympung kin ïakynduh bad ki nongthoh khubor ha ka sngi Palei ha Kiang Nangbah Stadium, Jowai ha ka por 2 baje janmiet.
Ka MSL mynta u snem kan dei kaba heh tam ha kaba kin don 25 ngut ki club na kylleng jong ka Jylla kiban sa ïashim bynta ïa kaba la phiah ha ki saw tylli ki group. Ka Tura (Chandmari Ground), Mawkyrwat (MDSA Ground), Shillong (Third Ground, Polo) bad Jowai (Kiang Nangbah Stadium). Ïa ki jingïalehkai phainal yn pynlong arsien (leg 1 bad leg 2) kata da ka jingïalehkai ha la ïing (Home) bad shabar na la ïing (Away). Katba ïa ka jingïalehkai phainal yn pynlong ha Nongbah Shillong.