Mynta yn rai ki 34 hajar tam ki nongthep vote, ïano kin pynlong MLA napdeng ki 6 ngut ki kyrtong
Election MLA ha Sohiong
Shillong, Jymmang 09: Ka jingïajied ïa u MLA jong ka Sohïong Constituency kan long ha ka sngi Balang, ka 10 tarik u Jymmang 2023.
Ki don hynriew ngut ki kyrtong ban ïakhun ha kane ka elekshon bad kita ki long u Bah Samlin Malngiang jong ka NPP, u Bah Synshar Lyngdoh jong ka UDP, u Bah S. Osborne na ka Congress, Bah Eric Kharbuki jong ka BJP, Bah Stoding Thabah jong ka Trinamool Congress bad Bah Sandondor Ryntathiang jong ka HSPDP.
Ha baroh don 34,783 ngut ki nongthep vote, ha kaba 17,096 kidei ki shynrang bad 17687 ngut ki kynthei. Kine ki paidbah kin thep vote ha ki 63 tylli ki Polling Station. U Chief Electoral Officer jong ka jylla, u Bah FR Kharkongor, u la ïathuh ba ki jingpynkhreh na ka bynta ka jingïajied nongmihkhmat jong ka Sohïong ki la biang lut nadong shadong, ha kaba ki ophisar bad kiwei pat kiba dei ban pynïaid ïa ka elekshon ki la poi lut sha ki jaka ban pynlong ka jingïathep vote.
Ha kajuh ka por pat ki don ki riewtymmen palat 150 ngut kiba la palat 80 snem ka rta ki ladep thep lypa na ïing bad kumba 54 ngut kiba don jingduna ki dkhot ki ladep thep.
Ban peit na ka bynta ka jingïaid beit kane ka elekshon kin don san kompeni CAPF bad ki don ruh ki flying squad kiba dei tang da ki Pulit kynthei, namar ba ki don ki jaka thep vote ba la buh ban thep tang ki kynthei bad ki nongpynïaid ruh kin dei beit ki kynthei. Kin don ruh ki jak athep vote ha kaba kan don ruh ka jingïathung dieng.
Lah ban kdew hangne ba ïa ka elekshon ha Sohïong la hap ban pynsangeh ban pynlong lang bad kiwei ki 59 tylli ki Constituency ha ka jylla ha ka 27 tarik u Rymphang 2023 na ka daw ka jingkhlad noh u Bah HDR Lyngdoh jong ka UDP.
Kane ka elekshon ha Sohïong kumba paw da ki jingmih khubor ha kine ki sngi baladep, ka lah ban long ka elekshon kaba lah ban wanrah ka jingkylla ha ka sorkar lane ha ka kynhun Myntri, ha kaba ki don ki nongïalam kiba la pynpaw ba ki lah ban don ki Myntri kiba la shah ban shah weng noh hadien ka elekshon Sohïong ban pynrung noh da kiwei.
Kane ka elekshon ka la sakhi ruh ïa ka jingïakawang ktieh hapdeng ka NPP bad ka UDP, ki artylliki Party kiba ïadon lang ha ka sorkar MDA:2.