La kem ïa 3 ngut ki BSF ba siat ïap ïa u Bah Roning ha Mawshun-Pomshutia

Shillong, Jymmang, 09: Ka tnat shipai ïada khappud Border Security Force (BSF) ka la kem noh ïa ki lai ngut ki shipai lajong da kaba set along halor ka jingkynnoh ba ki donnkti ban siat ïap ïa u Bah Roning Nongkynrih uba na ka shnong Jalynteng, Raid Nongkynrih.
Katkum ka thymmei khubor ba la ïoh lum la ïathuh ba ka tnat shipai BSF ka la pynlong ïa ka jingtohkit pyrshah ïa ki lai ngut ki shipai kiba la ithuh kum u Head Constable Moni Singh, u Constable Sengel Singh bad u Constable Kdam Kishore hadien ba la kem ïa ki ha ka Lah Sngi U Blei.
Ha kaba ïadei bad kane ka jingjia, ka tnat shipai BSF ka la pynmih ruh ïa ka hukum ban pynlong ïa ka jingtohkit katkum ka Court of Inquiry.
Nalor kata, ka tnat shipai BSF ka la sospon ïa u Moni Singh uba la synreit kuli na ka suloi lajong ka SMG Barreta bad la rah ïa u sha Headquarters jong ka tnat shipai BSF da kaba bthah ba un bud ïa ki kyndon ba pyrkhing hadien ba la sospon ïa u.
U Bah Nongkynrih uba la don arngut ki khun kiba dang rit u la shah siat ïap ha ki shipai BSF ha ka miet sngi Thohdieng jong ka taiew baladep ha khappud ka shnong shnong Pomshutia bad Mawshun, kaba hap hapoh ka Pynursla Civil Dub division halor ka jingsuba ba u donkti ban khaii tuh ïa ki masi.
Une u rangbah u la khladnoh hashen hadien ba ki kuli ki la shei na u ryndang bad ksam sha ki bynta jong ka khlieh.
U para jong u Bah Roning Nongkynrih, u Ribalskhem Nongkynrih uba shong lang hapoh ka trok kit masi u la lait im da ka said hadien ba u la tah da ka snam jong u hymmen ha ka durkhmat tang ban pyllait im ïalade na ki kuli jong ki shipai BSF.
Kum ka jingpyrshah ïa kane ka jingjia, ka Khasi Students Union, South Central Circle ka la pynlong da ka jingïalang paidbah ha Pynursla ha ka Lah Sngi U Blei bad dawa ïa ka tnat Pulit jong ka Jylla ban kem mardor ïa ki shipai BSF kiba donkti ha kane ka kam.
Ha kane kajuh ka sngi, ka kynhun jong ki briew ki bym lah satia ban ithuh ki la wiang ding ïa ka khyrdop talasi jong ki shipai BSF kaba don ha Lyngkhat.
U Myntri Rangbah ka Jylla u Conrad K. Sangma u la pyntip ba ka jingtohkit jong ki Pulit ka Pynursla Police Station ka dang ïaid shakhmat hadien ba ki bahaiing hasem ki la mudui da ka ejahar pyrshah ïa ki shipai BSF kiba donkti ban dkhat jubor ïa ka jingim jong u Bah Roning.
Ha kawei pat ka jingjia ka Kynhun ki briew bym lah ban tip, ki la wiang ding ïa ka sem pahara ki shipai Border Security Force ( BSF) ha Lyngkhat, kaba hap hapoh ka Pynursla Sub Division.
Kane ka jingjia kala jia hynnin ka miet Lah Sngi U Blei bad la ïathuh ba kine ki briew ki la ther maw laki laka ïa kane ka sem shwa ban wiang ding.
Kane kala jia hadien jong ka rally ba la pynlong da ka Khasi Students Union (KSU) hynnin ka sngi Nyngkong ban pyrshah ïa ka jingsiat iap ïa u nongniah trok bah Roning Nongkynrih.
Kat haduh mynta, kam pat don satia ka jingkem ïano ïano ruh bad ym pat ïohksai ba mano ba donkti ha kaba wiang ding ïa kane ka sem ki shipai.