Shillong, Jymmang, 09: Ka Sorkar Jylla ha ka sngi Baar ka la pynkut noh ïa ka jingleit shaw ïa ki nongshong shnong ka jylla hadien ba ka la lah ban leit shaw lut ïa baroh ki nongshong shnong kiba la sahkut ha ka Jylla Manipur hadien ba la khie ka jingïaumsnam kaba shyrkhei.
“Palat 242 ngut ki nongshong shnong kiba la leit shaw na Manipur tang hapoh ki hynriew sngi bad mynta ka sngi ka dei ka sngi kaba khatduh ba ngin leit shaw,” ong ka Dr. Ampareen Lyngdoh kaba long ka Myntri bad ka Nongaiktien jong ka Sorkar Jylla, kaba lam khmat ruh ha ka jingleit shaw ïa ki nongshong shnong ka Meghalaya na Manipur.
Ka jingleit shaw ka la sdang naduh ka 5 tarik mynta u bnai.
Na ki 242 ngut ki nongshong shnong, 168 ngut ki dei ki samla kiba pule ha RIMS, 37 ngut ha CAU, 7 ngut ha Manipur University, 4 ngut ha National Sports University. Ka Myntri ka la pyntip ba ka Sorkar ka la ai jingïarap ba leit shaw lang ïa ki bahaing hasem jong ki khynnah kiba sahkut ha Manipur hadien ba la khie ka jingïasumsnam.
“Ngi la ïatreilang bad ki shipai bad ki bor pahara jong ka Jylla Manipur. Ngi dap ruh da ka jingsngewnguh shikatdei eh ba ki la wan shakhmat ban ai jingïarap marmar ïa ki khynnah pule jong ngi kiba don hapdeng ka jingsyier mynsiem,” la ong ka Dr. Ampareen.
Haba ïathuh ba wat ïa u Nongbishar barim ruh u la pan jingïarap na ka Sorkar, ka Dr. Ampareen ka la ong, “wat ma u ruh, u la pan jingïarap na ka Sorkar Meghalaya. Katkum ka jingtip jong nga, la ïoh ban leit shaw lang ïa u ruh tangba ngan hap ban da pynshisha hynrei watla katta ngi la ïoh bun tylli ki jingpan jingïarap na baroh ki nongshong shnong bad ngi dei ban sngewnguh ïa u Myntri Rangbah namarba u la shimkhia bha haba ki nongshong shnong jong ngi ki la mad ïa ki jingshah byrngem ha ki jingjia kiba sngewsih.”
Ka la ïathuh ba ka Sorkar kam shym la pynbor ïano ïano ruh ban wan phai sha la ing hynrei ka Sorkar ka la ïoh bun ki jingkyrpad na ki paidbah kiba im hapdeng ka jingsyier mynsiem na ka jingïaumsnam. “Ngi la rai ban leh kyrkieh da kaba leit shaw noh ïa ki mar mar bad ngi la lah ban leh ïa kane da kaba pyndonkam da kiba bun ki lad ki lynti,” la ong ka Nongaiktien jong ka Sorkar.
Shuh shuh ka la ïathuh ba ka Sorkar Jylla ka la ïoh da ka liengsuiñ kaba kyrpang na ka Sorkar India ha ka 5 tarik ha kaba 67 ngut ki kynnah la lah ban leit shaw. Ha ka 6 tarik, ka Sorkar kala ïatreilang bad ki Commercial Airlines ban pyntikna ba ïa ki tiket yn thied ha ka kyrteng jong ki nongshong shnong namarba kim lah shuh ban thied ïa ki tiket na ka daw ka jingkhang syndet ïa ka Internet.
Haba pynpaw ïa ka jingsngewnguh ïa ki shipai, ka Myntri ka la ong, “khlem ki shipai, kane ka kam kan jin da la long kaba jwat namarba ki don ki khep ba ki nongshong shnong kiba sahkut ha ki jaka kiba kham jngai, ha kaba ki jingïaumsnam ki ker pyllun ïa ki. Ngi sngewkmen ïa ki shipai kiba la synran lang ïa ngi. Ki dei ban ïoh ïa ka jingai khublei kaba kyrpang. Ngi sngewnguh shikatdei ruh ïa ki ophisar jong ka Sorkar Meghalaya.”
Ka Dr. Ampareen ka la ai khublei ïa ki volunteer jong ka NPP ha Manipur da kaba ong ba ki la long ka kti ka mon kti ka diang ban pynthikna ba ki paidbah kin ym ïap tyrsaw. “Ki dkhot ka NPP jong ka Manipur ki la wan shakhmat ban ïarap. Ngi sngewnguh shikatdei eh ïa ki volunteer jong ngi,” bynrap ka Myntri.
Ka Myntri ka la ïathuh ba ka Sorkar ka la hap ban siew hapdeng T. 5000 haduh T. 8000 na ka bynta ban thied kawei ka tiket.
