Shillong, Rymphang, 15: Haduh T. 1,07,71,366 klur la pynlut ha ka shi snem na ka bynta ka jingtreikam jong ka Meghalaya Lokayukta ha u snem 2022-2023.
Na kane, T. 48,75,902 lak la pynlut ha kaba siew tulop ïa u Chairperson, ïa u Director of Inquiry bad u Director of Prosecution bad ki Enquiry/Investigation Officer, T. 19,40,202 lak na ka bynta ka bainong jong ki nongtrei Casual, T. 29,54, 672 lak ka jingpynlut ha ki kam ophis, T. 4,12,270 lak ka bai wai ophis bad ka bai thang bording, T. 2,47,820 ka legal fee bad T. 3,40,820 kiwei kiwei ki jingsiew.
Ïa kane la pyntip da u Secretary jong ka Meghalaya Lokayukta Bah R. Rapthap ha ka jubab ba la ai ha ka 9 tarik mynta u bnai katkum ka hok jingtip Right to Information (RTI) Act, 2005 ba la pan da ki arngut ki nongtrei mon sngewbha ba kynthup ïa ka nongïalam jong ka TUR ka Kong Angela Rangad bad ka President ka CSWO Kong Agnes Kharshiing.
Ka jubab ka ïathuh ba T. 43,52,240 lak la pynlut ha u snem 2021-22, T, 1,01,60,617 klur ha u snem 2020-21 bad T. 85,39,627 lak ha u snem 2019-20.
Ka jubab ka pyntip ruh ba ka jingthungkam ban pyndap ïa ki kam ba la mang hapoh ka Meghalaya Lokayukta ka dang ïaid shakhmat bad la khmihlynti ban pyndep noh hapoh lai bnai.
Katkum ka jubab jong u Secretary, haduh mynta ka Meghalaya Lokayukta ka shu thung da ki nongtrei Casual ba la siew bainong manla u bnai katkum ka jingpynbna ba la pynmih da ka tnat Labour jong ka Sorkar Jylla. Ka jingthung ïa ki nongtrei Casual ka dei kaba la ïoh jingmynjur na ka Sorkar.
Kine ki kynthup, uwei u LDA cum Accountant, uwei u DEO, uwei u Stenographer Grade III, lai ngut ki peon/bunglow peon, lai ngut ki nongniah kali, uwei u nongsar ing, uwei u chowkidar bad uwei u Cleaner.
Ka jubab shuh shuh ka pyntip, ‘ngim don ïa ki nongtrei Contractual ha ka Meghalaya Lokayukta”.
La pyntip ba ki ophisar hapoh ka Meghalaya Lokayukta ba kynthup ïa u Director of Inquiry bad Director of Prosecution bad ki Inquiry/Investigation Officer la thung da u Chairperson hadien ba la ai jingmynjur da ka Sorkar.
