Shillong, Lber 12: U MLA ka BJP u Bah Sanbor Shullai u la pynshai ïa ka aiñ kaba la dep ban pynbna da ka sorkar pdeng kaba la pynpaw shai ba ki jaka kiba hab hapoh ka khyrnit kaba 6 kiba kynthup ïa ka jylla Meghalaya kin lait na ka jingshah pyntreikam ïa ka Citizenship amendment act kaba la long katkum ka dorkhas kaba u la dep phah sha ka sorkar pdeng ha ka 19 tarik u Naiwieng ha u snem, 2019.
U Bah Sanbor Shullai u la ong ba u dei uba nyngkong u MLA ka BJP na ka thaiñ shatei lammihngi uba la rah ïa kane ka mat kaba ïadei bad ki jylla kane ka thaiñ shatei lammihngi ban pynlait ïa ki thaiñ riewlum na ka jingpyntreikam ïa ka citizenship amendment act.
U Bah Sanbor Shullai u la ai khublei ïa u Myntri Rangbah duh ka ri u Narendra Modi ba u la pyllait ïa ki jaka ki riewlum hapoh ka act bad u la ong ba tang ka party BJP kiba kren da ki MLA ka BJP na ki jylla kane ka thaiñ shatei lammihngi kaba la pdiang ruh da ka sorkar pdeng.
U Bah Shri Sanbor Shullai u la ong ba ka citizenship act 1955 lah dep ban pynkylla kham mynshwa da ka sorkar ka seng Congress bad ki jaka ki riewlum kim pat ju lait hapoh ka jingsynshar jong ka congress, hynrei ka sorkar BJP hapoh ka jingïalam jong u Narendra Modi u la pyllait ïa kine ki thaiñ riewlum napoh ka citizenship amendment act 2019.
U Bah Sanbor Shullai shuh shuh u la pynshai ba hapoh ka kyndon jong ka section 6(B) point no 3 jong ka bynta ba la bsut ka la pynshai bha ha kaba ïadei bad ka jingïoh long nongshong shnong watla ki don ki mukotduma kiba dang sah pyrshah ïa u.
Shuh shuh katkum ka citizenship amendment act 2019 ki kyndon kiba la bsuh ki la pynshai ba tang kito kiba rung sha India ha lane shwa ka 31 tarik u Nohprah 2014 bad hapoh kane ka clause ka por kaba rit ban sah kam dei ban duna ïa ka 5 snem ha ka jaka jong ka 11 snem kaba la kdew hapoh ka citizenship act 1955.
Kumta haba peit ïa baroh kitei ki kyndon u MLA ka BJP u la ong ba ka Meghalaya ka la leit pura na ki kyndon jong ka CAA.
U MLA ka BJP u Bah Sanbor Shullai u la ong ba katkum ka jingtohkit na ki village council, welfare society bad kiwei ki seng ha ki non-schedule area ha Shillong ki seng ki la pyntip ba ki khlem ïoh ïaid lyngba kum kine ki kam sha u snem 2014. Kumta ka long kaba shai ba ka CAA kan ym lah ban pyntreikam ha ki jaka Khasi bad Jaiñtia hills kynthup ïa ka jylla Meghalaya, naba ka sorkar pdeng ka la dep pyllait ïa ki jaka ba hab hapoh ka khyrnit ba 6 ka riti synshar ka ri India kumba la pynkylla.
“Ngi dei ban ai khublei ïa u Myntri Rangbah duh ka ri u Narendra Modi ji bad u Myntri ka tnat ki Kam Pohïing u Amit Shah uba la kynthup lang ïa ka kynhun ki khristan hapoh ka Citizenship amendment act 2019 naba bun ki khristan khambun kiba don ha Pakistan bad ri Afghanistan kin ïoh ka jingmyntoi na kane ka act. Kumta nga kyrpad ïa baroh ki nongshong shnong ka jylla ba kim dei ban shah ïalam bakla ha kino kino ki seng saiñ pyrthei naba kane ka aiñ kam don jingïadei hapoh kane ka jylla Meghalaya,” ong u Bah Sanbor.
