Ka KHADC kam dei ban ailad ban mushlia ïa ki kam dawa Rangbah Shnong ki Garo: Titos

Shillong, Lber 12: U Nongïalam ka Liang Ïatei ha KHADC u Bah Titosstarwell Chyne uba dei u MDC ka Sohra bad u CEM barim haba ïashimbynta ha ka jingïatai nia kaba kyllum halor ka mang tyngka kaba la wanrah da u CEM ka KHADC u Bah Pynïaid Sing Syiem ha ka sngi sdang ka dorbar mang tyngka u la pynpaw ba ka jingkwah jong kawei ka kynhun Garo ban ai jingithuh ïa ki Rangbah shnong Garo kiba don ha ki 54 tylli ki shnong ha thaiñ Ri Bhoi ka long ka jingma ïa ka riti synshar khaddar ka jaitbynriew Khasi.
U la ong ba lada ai lad ïa ki Garo ban long Rangbah Shnong kum ha kiwei ki shnong ne Hima kiba lah don la ki jong ki aiñ ne Act kan jia aïu ïa ki.
“Haba ïadei bad ka jingphah tuklar jong ki na ki bor kiba nabar haba ïadei bad ka jingkwah ban ithuh ïa ki kum ki Rangbah shnong, ka KHADC kam dei ban ailad satia ïa ki jingtuklar kiba wan na kino kino ki liang, namar kumba long mynta kine ki paralok Garo ki ïoh ïa ki kam pynroi kum ba ïoh kiwei kumta ym dei ban ïasuk ne compromise halor kane ka bynta,” kyntu u Bah Titosstarwell Chyne.
Haba jubab ïa kane u Symbud CEM u Bah P N Syiem uba khmih ruh ïa ka Elaka u la ong ba na ka liang ka KHADC ne EC kaba mynta ka khlem pat ai jingithuh ïa ki Rangbah shnong Garo bad namarba ka thaiñ Marwet ka hab hapoh ka jingpeit jong ka Hima Mylliem kumta ka Hima ka la jied da ki Circle Rangbah Shnong.
Lah ban pynkynmaw ba na ka liang ka All Ri -Bhoi Garo Headmen Association (ARGHA) ha ryngkatlang bad ka All Khasi Hills Achik federation ki la leit ban ïakynduh ïa u Myntri Rangbah ka jylla u Conrad K Sangma ban pynpaw ïa ka jingsngew pyrshah halor ka jingithuh ïa u Rangbah Shnong ki Garo da katto katne ki kynhun hapoh ka thaiñ Marwet.
U President ka headmen association, u Nickel R Marak u la ong ba ki long ki nongshong shnong kane ka thaiñ mynta naduh ki por ba dang synshar ki phareng bad ki la don la u jong u Rangbah Shnong Garo hynrei mynta ka lah don kawei ka seng kaba la thoh sha ka KHADC ba kam dei ban ithuh ïa u Rangbah Shnong Garo bad halor kane hadien ba ki la ïoh ïa ka shithi na ka KHADC halor kane ka kam.
Kumta kane ka kynhun ka la leit ban ïakynduh ïa u Myntri Rangbah ka jylla bad ban kyrpad ïa u ban pynthikna ba ka riti dustur bad ka jingithuh ïa u Rangbah Shnong Garo kan dei ban bteng ha kine ki 54 tylli ki shnong.