Ka Sorkar ka dei ban shimkhia haba don ki jingkhih phaloh na ka jingsngew pher niam: SAFF

Shillong, Lber 12: Ka Synjuk ki nongïalam niam ha Shillong, ka Shillong All Faiths Forum (SAFF) ka la kyntu ïa ka sorkar ba kan shimkhia bad leh hok haba don kino kino ki jingjia kiba wanrah ïa ka jingshong syier ha ka imlang sahlang.
Haba ïakren bad ki nongthoh khubor, u Rev. P. Lyngdoh, uba long u Chairman ka Forum, u la ong ba ki don ki bor kiba na shabar ka jylla kiba thmu ban wanrah ka jingïasngew pher niam ha ka jylla kumba la jia ha ki jaka khappud ha kine ki sngi baladep, na ka liang ka sorkar ka hap ban shimkhia bad ban trei hok da ka lynti kaba khuid ba suba, khnang ba ki paidbah kin nym don hapdeng ka jingshong syier.
Shuh shuh na ka liang ka Forum, ka la ïathuh ba ka la buddien ha kaba ïadei bad ka jingjia ha khappud ha kaba ki skul jong ki Balang Khristan ki la shong syier, na ka liang ka sorkar ka la pyntip ba u Chief Secretary ka jylla u la ïakren bad u Chief Secretary ka Assam ban ïapynbeit, khnang ba kan nym don kano kano ka jingjia ba wanrah ïa ka jingthut ka suk ka saiñ.
Ha kajuh ka por na ka liang ka Forum ka kyntu ruh ïa ki paidbah ba kin pynneh ïa ka jingshongsuk shongsaiñ da kaba kiar na ki kam pynshit bad ban nym ngeit bieit than ïa ka jingïathuh jong kiwei pat.
Ki la ong ruh ba na ka liang jong ki kum ki nongïalam niam, kin ïatreilang la ka long bad ki bor sorkar ne bad ki paidbah ban wanrah bad pynneh ïa ka shonsuk shongsaiñ ha ka jylla.