Shillong, Lber 12: U Myntri Rangbah ka jylla u Conrad K Sangma, ha ka sngi baar u la buh ïa bun tylli ki mawnongrim na ka bynta ki 4 tylli ki projek ha ki jaka sor ha ka prokram ba la pynlong ha Ward lake Shillong. Ki projek ki kynthup ïa ka Development of Commercial Building ha Polo, ïa ka Mechanised Multi-Level Car Parking kaba ha Vivekananda Road, nangta hajan ka Additional Secretariat bad ka Polo Commercial Complex, ka jingpynitynnad ne ka Beautification ïa ka Ïewduh bad ka jingkyntiew bad pynbha briew ïa ki 5 tylli ki pung ne ki Lake ha ka jylla bad ki jaka ba don ka Ward Lake.
Haba kren ha ka jingïalang u Myntri Rangbah u Conrad K Sangma, u la ong ba ka sorkar ka don ka jingthmu bad ïohi jngai ban pynkylla ïa ka nongbah Shillong sha ka nongbah kaba long katkum ka juk kaba mynta khamtam haba ïadei bad ka jingkhap ngiah.
Haba kren shaphang ka jingpynbhabriew ïa ka Ïewduh u Myntri Rangbah u la ong, “Kane kadei kaba ngi la pyrkhat bad kaba ngi la trei khnang ba ïa ka ïew la pynbhabriew bad ki kam jingtei kin khambha ban khring ïa ki nongwan jngohkai,” u la ong.
U la ong ïathuh ba kumba T. 15 klur la mang ïa kane ka project ban pynthymmai bad pynkylla ïa kane ka ïew kaba la buh da u mynbarim bad ka ïew ki trai ri trai muluk. Ha kane ka projek kan don ka jingpynbeit thymmai ïa ki pipe um, ki nala, ka jingshna ïa ki jaka leitbar paidbah, ka jingbuh ïa ki kali kit ñuit bad ki jaka bret ñuit, ka jingpynthaba ïa ka ïew da ki bording ilektrik bad kiwei.
Haba kren shaphang ka jingpynbha briew ïa ka Ward’s Lake bad ka Ward’s Lake Promenade u Myntri Rangbah u la ong ba shi bynta na ka projek kan leit sha ka jingïar kaba 1.5-2 km pyrshah jong ka Ward’s Lake ha kaban shna ïa ki dukan, ki jaka die jingdie ha madan, jaka ïeng kali bad kiwei kiwei.
U Myntri Rangbah ka jylla u la ong ba ka thong jong ka sorkar ka long ban peit ïa ka jingeh halor ka jingkhap ngiah bad ka jingpynïaid ki kali hapoh nongbah Shillong. Haba kren shaphang ka jingthmu ban pynkynriah noh ïa ki ophis treikam na Shillong sha ka nongbah ba thymmai ne ka new administrative city, u la ïathuh ba kane ka projek kaba kynthup ïa kiba bun ki kam halor ka jingpynkylluid ïa ka Shillong ka jinglut ka la kot sha ka malu mala T. 90 klur kaba dei ruh ka jaka ïeng kali kaba ngiam kumba 465 tylli ki kali ha kine ki jaka.
U la ïathuh ba 5 tylli ki nan ne Pung kiba kyrteng ka Ward’s Lake, Malse Lake, Nirman Jheel, Memo Lake kum kaba ha Williamnagar bad ka Rangjokram Lake ha Resubelpara yn pynbha briew bad pynkhuid.
