Shillong, Jymmang 01 : Ki la don haduh 13,000 tylli ki kali rim kiban ym ïoh shuh ban ïaid ha surok kali hadien ba ka sorkar ka la pyntreikam ïa ka Vehicle Scrappage Policy ha ka jylla, rai ka jingïalang jong ka Kynhun Myntri ha kane ka sngi Palei.
Haba kren bad ki lad pathai khubor, u Nongai ktien jong ka sorkar, Bah Paul Lyngdoh ba dei ruh u Myntri sorkar ka jylla, u la ïathuh ba kane ka sienjam ba ka sorkar jylla ka shim kadei eh ban pynduna ïa ka lyer jaboh kaba ju mih na ki kali kiba la rim.
Shuh shuh haba batai bniah halor kane, u Myntri ula ong ba haduh mynta na ki 13,000 tylli ki kali rim kiba ngat ha katei ka thup ban ym shah ïaid shuh ha surok ynda la pyntrei kam ïa katei ka policy, haduh 5,000 tylli ki dei ki kali sorkar bad 8,000 tylli pat ki dei ki kali jong ki riew shimet.
“Ki kali kiba la rim kiba ym ïahap shuh ban ïaid ha surok ki ngat ha kane ka policy,” u la ong. Nangta u la ong ruh ba ba na bynta ki kali sorkar ki kali kiba la dap 15 snem shajrong ki la ngat ha kane ka policy. Katba na bynta ki kali shimet kito kiba la dap 35 snem shajrong ki la shah kynthup lang ha kane ka policy.
Nangta u ong ruh bai haduh mynta hi, tang ha Shillong ki la don haduh 2,76,262 tylli ki kali bud pat sa ka Jowai bad Tura. “Kumta, mynta ngi la sdang ban shimkhïa ïa kane ka kam kaba ktah bad ïadei bad ka jingjaboh ka lyer kaba mih na ka kali.”
