Lynshop u phria ha ki shnong ka West bad EWKH, julor da ki spah tylli ki ïing bad ki jingthung

Nongstoiñ, Jymmang, 01: U phria u ba heh bha ryngkat u lapbah lapsan, ha ka step sngi palei ha ka por kumba 10 baje ei ei, u la lynshop ha kiba bun ki shnong ka Eastern West Khasi Hills bad West Khasi Hills District, kaba lam sha ka jingpynjulor ïa ki Ïing ki sem bad ki jaka rep.
Ki tyllong khubor ki ïathuh ba kane ka jinghap u phria ka la jia hapdeng ka por 10 baje mynstep haduh 10:30 baje ei ei. Ki Shnong kiba shah ktah jur bha ha Eastern West Khasi Hills, ki kynthup ïa ka Mawkohmit, Mawblei, Rikhen, Thangmaw bad Nongrang.
Nalor nangta, ki Ïing kiba kot haduh spah tylli ki la julor bad pei thliew lut ki tnum na ka jinghap u phria u ba u heh kat ki marble bad palat, haduh ba bun ki la hap ban leit sah noh sha ki ïing jong ki ba haïing hasem bad ki marjan marpa.
Ka jingpynjulor jong une u phria ka la ktah jur eh ïa ki jaka rep bad ki nongrep, ki la shu pait mynsiem ban ïohi ïa ka jingtrei shitom kaba la shah pynjot tang da ki khyllipmat. Ki jingthung kynthup naduh u phan, biskot, sohmynken bad kumjuh ruh ki diengsoh kila julor lut ha kane ka jinghap phria.
Na ka liang u MDC ka Mawthadraishan Bah Powell Sohkhlet, u la hiar ban jurip ïa kine ki shnong bad ïakynduh ruh ïa ki lanot bad ki nongïalam shnong, ban ïakren halor ki jingshah pynjot jong ki nongrep ha kine ki shnong.
Une u MDC ba don burom u la pyntip ruh kloi lan naduh ka por mynstep sha ka Block Development Officer (BDO) ka Mairang ba kan phah jurip kyrkieh ïa ki Ophisar bad ban pynsted ïa ki lad ai jingïarap.
Shuh shuh, ki tyllong khubor ki ïathuh ba ha West Khasi Hills ka la don ka jingther phria ha ki katto katne ki shnong. Kawei ka shnong ka dei ka Shnong Mawkadiang, kaba mad ïa ka jinghap u phria u ba la neh palat 1 kynta eiei.
Ha kane ka Shnong, da ki phew tylli ki Ïing ki la julor na ka jingpei lut ki tnum ïing. U Sordar ka Shnong Bad Paising Puweiñ u la pyntip ba katkum ka jingïoh jingtip ka Shnong, la antad ba ki don kumba 20 tylli ki Ïing kiba la shah ktah na kane ka jingjia. Na ka liang ka shnong kan sa leh ïa kaba donkam ban ïarap ryngkat bad ki bor ba dei peit.