Yn ym ailad ka HITO ïa u Kirti Azad ban wan kiew ha jylla katba um wan pan map

Ngin kiew rynsan ban ïalap elekshon ban pynrem ïa ki MLA ka MDA

0

Shillong, Nohprah 30: Ka Hynniewtrep Integrated Territorial Organization (HITO) ha ka sngi Thohdieng ka la pynlong ïa ka jingïalang bad ka jingïaid paidbah na Motphran sha State Central Library ha jaka ba don u mot Sahnam u Kiang Nongbah kum shi bynta ban rakhe ïa ka lyngkhuh sngi khlad ba 160 jong ka u bad kumjuhban pynpaw ïa ka jingpyrshah ïa u nongïalam ka TMC uba dei ruh u MP barim u Kirti Azad halor ka jingkren pynpoh dor jong u ïa ka riam tynrai jong ki Khasi kaba u la kren ïa u Myntri Rangbahduh ka ri u Narendra Modi uba la riam da ka riam Khasi ha ka jingwan ïuhkjat jong u ha Shillongha ka 18 tarik mynta u bnai.
Haba kren ha kane ka sngi ki nongïalam ka HITO da kawei ka sur ki pynpaw ba kane ka jingkren jong une u nongïalam ka TMC kam dei tang ka jingkren kynthoh ïa u Myntri Rangbahduh ka ri hynrei ka dei ruh ka jingkren beiñ bad ka jingpeitpoh bad pynpohdor ïa ka riam tynrai ki Khasi kaba u myntri Rangbahduh u phong ha kato ka sngi.
U Vice President ka HITO na Ribhoi u Elvis Kyrsian u la ong ba kane ka jingkren u nongïalam ka TMC ka dei kaba la pynmong ïa ka jaidbynriew baroh ba ka jingpanmap jong u tang lyngba ki social media ka seng kam pat hun satia bad ka dawa ba u dei ban pamap da ka jingthoh ne bad ban wan panmap ha khmat ki paid ka Bri u Hynñiewtrep lymkumta ka seng kan nym ailad satia ïa u ba un ïuhkjat ha ka jylla.
“Lada mem panmap da ka jingthoh ha khmat ki paid ka Bri u Hynñiewtrep kynmaw ngin ym ailad satia ba men wan ïuhkjat sha kane ka jylla jong ngi,” u la ong.
U President ka seng u Bah Donbok Dkhar haba ai jingkren u la ong ba ka HITO kam dei ba ka leh saiñ pyrthei ïa kane ka mat hynrei namar wat ka riti synshar ka ri ruh ka ai ka jingïada ïa ki briew ba kin phong ïa ki riam tynrai jong ki.
“Kynmaw ko Kirti Azad ïa ka riam tynrai jong ngi kam dei kaba men lah ban phong tang ba me don pisa ban thied hynrei ban phong da ka jingsarong kumba ngi phong me dei ban don ka burom kaban ïahap bad ka jingkheiñ kyntang jong ngi ïa kane ka riam tynrai,” u la ong.
Haba kren halor ka jingaipor ba lai sngi jong ka seng ïa ki party kiba don ha ka MDA ba ki dei ban weng noh ïa ka jingkyrshan na ka MDA lym kumta ka seng kan ïeng ban ïalap elekshon pyrshah ïa baroh kito ki party bad ki MLA kiba don ha ka sorkar namar ka jingkyntairt ban pynlong da ka dorbar kyrpang ban pyndam ïa ka aiñ khalai.
“Ka jingaipor jong ngi ka la kut bad ngin kren hangne da kaba shai ba ngin kiew rynsan ban ïalap elekshon ban pynrem ïa kine ki party bad ki MLA ba don ha ka MDA namar baroh ki dei kiba kyrshan ïa ka casino,” u la ong bad bynrap ruh, “ka casino ha ka jylla kan treikam biang tang shu wan biang kane ka sorkar ha ka bor namar ïa ka aiñ pyndam khalai ruh ka wanrah tang ka ordinance kaba ka rta ba kan treikam kan dei tang 6 bnai ym da ka act kaban im junom, dei namarkata ngin hap leit sha u paidbah ban pynsngewthuh ïa kane bad ba u dei ban pynliem lyndang lut ïa baroh kine ki MLA kiba don ha ka MDA khamtam eh ïa ki myntri sorkar,”u la maham tyngeh.
U Donbok u la ong ba ka la dei ka por ba ki paidbah ka ri Khasi kin stad ban jied ïa ki nongïalam kiba long ki nongthaw ain ba kit khlieh ïa ka bha ka miat ki paidbah bad ka jylla baroh kawei bad ki paidbah kim dei ban shah pynbiej ha ka T. 5000 kiba kwah ban long nongïalam tang ban myntoi shimet.
U la bynrap ruh ba ka seng ka pynlong ruh ïa kane ka jingïaid paidbah naka bynta ban dawa naka sorkar jylla ban pynbit pynbiang ïa ki lad jingsumar, ka pule puthi, ki surok bad kiwei kiwei de ki kam pynroi ha baroh kawei ka jylla.
Ka HITO ha kane ka sngi ka la leit ruh ban buh syntiew ha u durmot jong u Kiang Nangbah ban kynmaw burom ïa ka lyngkhuh sngi khlad ba 160 jong u ha u tyllai pasi ki Phareng.
Ha kane ka sngi la sakhi ba da ki palat spah ngut ki paidbah ki la wan ai jingkyrshan ïa ka HITO ha ryngkat kiba bun kiba la riam da ki jynriam tynrai ha kaba ki pulit ruh ki la pahara ha shi lynter ka surok naduh Motphran terter shaduh State Central Library.

Leave A Reply

Your email address will not be published.