Ngi im ha ki sngi ba ki don sa tang ki khlawait nong wohnia ha Social Media: Lambokstarwell

Shillong, Nohprah, 30: “Ki paralok ki ong ba ki sengbhalang mynta ki shu heh tang ka tyngam, ki heh tang ka nia, hynrei ngi im ha ki sngi ba ki don kita ki khlawait tang ha Social Media, ban mih sha madan ki tieng ïoh shah kem, ki tieng ïa u Pulit. Ha kine ki sngi ba mynta ki khlawait ba shyrkhei ki dei ki nongwohnia ki bym im sngi ban pyrkhat na ka bynta ka ri bad ka jaidbyrnriew bad ki bym shlan ban kren ïa ki jingshisha hynrei kiba im tang ban wohnia ïa kiba trei na ka bynta ka jaidbynriew,” ong u President ka KSU u Samla Lambokstarwell Marngar ha ka jingrakhe kynmaw burom ka lyngkhuh sngi ïap kaba 160 snem jong u Kiang Nangbah ha ka sngi Thohdieng.
Ki dkhot ka KSU bad ka FKJGP ki la rakhe rakhe kynmaw burom ka lyngkhuh sngi ïap kaba 160 snem jong u Kiang Nangbah da kaba buh syntiew hakhmat u durmot uba don hajan ka Shillong Civil Hospital.
Ha kane ka sngi, la sakhi lang da ki nongïalam barim ka KSU kiba kynthup ïa u Bah Michael Syiem, u Bah Paul Lyngdoh, u Bah Danny Khryiem bad kiwei kiwei.
U la pynkynmaw ruh ba u tyllai phasi jong ka Sorkar Phareng um shym la lah ban dkhat jubor ïa ka mynsiem ieid ri jong u Woh Kiang Nangbah bad ki aiñ khyllah jong ka Sorkar India kim shym la lah ban dkhat jubor ïa ka mynsiem ba shynrang jong ki khun ka Bri u Hynñiewtrep.
“Ha une u snem 2022, ngi la sakhi bun bah ki jingjia ha ka jaidbynriew kum ki jingjaw ummat bad ka jingjaw snam haba ki paradoh parasnam kiba im ha khappud ki la mad ïa ki jingshah pyndik bad ngi la sakhi ruh ïa kaei kaba ladep jia ha Mukroh,” u la ong.
“Ngi suba bad ngi dang tih bniah ba hangne ha sor Shillong ki jaka ki puta ki la sdang ban leit lut sha ki heh saipan. Ka jingkylli ka long, sha khappud la shah kyntur ha ka Assam bad ha Shilong la lut ki jaka, shaei ka jaidbynriew kan leit,” la buh jingkylli u Samla Lambokstarwell.
U la ong ruh ba ka Seng ha u snem ba thymmai kan dang ïai bteng ban ïai pynsngew ïa ki mat ki jura sha ka Sorkar ïa ki jingdawa jong ka jaidbynriew.
Haba ïathuh ïa ka jingsin jong ki dkhot sengbhalang ïa ki Pulit da ki ksew, une u nongïalam ka KSU u la ong, “nga kren shai balei ki dkhot sengbhalang ki khot ïa ki Pulit kum ki Ksew bad balei ki pyrta kumta, u don u dkhot ka seng uba dang lait na along, namarba ha along la kren ïa ki palat ban ïa u ksew. Nga kwah ban kren sha ki nongbat aiñ, sngewbha ynnai pynbitar, ynnai aiding ïa ka mynsiem jong ki samla hynrei pyndep hok ïa la ka kamram ba ka Sorkar ka la pynkhamti hynrei wat ñiew poh ïa ki samla kiba rung ha along na ka bynta ki dawbah jong ka jaidbynriew.”
“Ngi ïakhun na ka bynta ki dawbah jong ka jaidbynriew bad ym shym la don Sorkar kaba siew tulop ïa ngi, ngi don tang ka snam bad ka jingim ban siewspah ba ka jaidbynriew ba kan im. Nga kyntu ïa ki dkhot ba kin shim ïa ki jingshah pyntyrha kum ki jingai mynsiem ban nang pynkhlaiñ ïa ka jingshakri jong phi,” u la bynrap.
U Bah Paul Lyngdoh haba kren ha kane ka sngi, u la pynkynmaw ba u Kiang Nangbah um shym wan na ki ing paki dulan hynrei u la long u riewmadan ba u Blei u la bsiap ha u kum u nongïalam.
“Ki la don ki riewkhraw kiba mih na ki ing Syiem ban ïada ïa ka dewmet kum u Tirot Sing, ki don kiba mih na ka iing trep ban ïada ïa kane ka dewmet kum u Kiang Nangbah, ki la don kiba ym shym la rah wait, rah stieh hynrei ki rah ïa u khulom kum u Soso Tham, u Bah Desmond Kharmawphlang ter ter kiwei kiwei ban ïada bad ban pynskhem ïa ka la jaidbynriew,” u la ong.
“Naduh ki riewmadan, ki Syiem, haduh ki riewpyrkhat, ngi dei ban pynïatylli lang ban ïoh bor ban pynkhlaiñ bad ban pynskhem ïa ka jinglong tynrai jong ngi halor kane ka dewmet,” u la ong bad bynrap, “ha ki 31 snem mynshwa ba nga la rung ha ka KSU bad haduh mynta nga ïohi kiba mih bad kiba tur shakhmat ki dei kiba wan na ki longing kiba duna ka ïoh ka kot bad ki iing ki bym dei ki khun binong ki khun bishon hynrei kiba ka kamai ka kajih ka long kaba tlot, hynrei ki ïakhun, ki ïada, ki ïap na ka bynta ka kane ka jaidbynriew. Katba kiba duna eh ban mih shakhmat ki dei na ki iing paki dulan, ki ing jong ki heh saipan. ngi ïakhun ma ngi, ma phi na ki ing kiba shu bit shu biang ka ïoh ka kot hynrei phi ïoh ïa ka jinghikai ban ïalam ïa ka jaidbynriew na kum kata ka longiing hynrei ynda la poi ka por ban thaw aiñ, wan poi pynban da ki heh spah nangno re ki bym tip ïa ka jingïapher jong u Kiang Nangbah bad u Tirot Sing,” la ong u Bah Paul.
U la kyntu ruh ïa ki briew kiba mih shakhmat ban ong ba ki kwah ban mihkhmat ban ïalam ïa ka jaidbynriew ki dei ban da pyntbit ïalade shwa ïalade ban tip nyngkong ïa ka histori jong ka jaidbynriew, ban tip ïa ka riti syshar, ban pule ïa ki aiñ, ban pule ïa ki Notification, hangta kin sa long kiba la bit ban mihkhmat ïa u paidlang jong ka jaidbynriew.
“Hato kam ladei ka por ban pynthymmai ïa ka rukom pyrkhat ka jong ngi lada ngim kwah shuh ban shah phasi,” la ong u Bah Paul haba kyntu ïa ki paidbah ka jylla ha ka jingpdiang ïa u snem thymmai ba ka jylla Meghalaya kan sa leit sha ka jingjied ïa ki nongthawaiñ ba thymmai jong ka Iingdorbar Thawaiñ.
“Mynta u tyllai phasi u ap ïa u ryndang jong kawei ka jaidbynriew. Lada ngi bakla lynti, uta u tyllai un nang syngit un nang khñiot bad khatduh ngin ym lah ban ring mynsiem,” u la ong.