Shillong, Nohprah 30: U Bah Daniel Stone Lyngdoh, uba long u Nongsaidaiñ ha Supreme Court bad uwei na ki nongthoh kot ka jylla ha ka 26 taruk mynta u bnai, u la pyllait paidvah sa ïa kawei ka kot ba la ai kyrteng, “Ki Dak ka Hima Khasi ba la jah noh”.
ïa kane ka kot la pyllait ha u lum Mawhiang da u ADC jong ka Eastern West Khasi Hills, u Bah Alertson Nongbri uba long kum u Kongsan ha kane ka jingïalang ha kaba la ïadon lang ruh u Bah Raphael Warjri, kum u Kongsan Symbud.
Napdeng Ki kot kiba u Daniel Stone Lyngdoh u advocate ka Supreme Court of India u la thoh, kane ka kot ka dei kaba kham kyrpang. U nongthoh tang ha kane ka snem 2022 u la pynmih 4 tylli ki kot kiba donkam ïa ka jaidbynriew. Lah ban pynkynmaw hangne ba ha ka 7 tarik u bnai Kyllayngkot, 2022 ia ka kot jong u KA JINGSDANG KA HIMA LANGRIN HADUH KA POR U NONGTEI SINGH SYIEMIONG la pyllaitpaitbah da u syiem Nongtei Singh Syiemiong ha Phlangdiloin hapoh ka Hima Langrin kaba dei ka kot kaba nyngkong kaba la thong shaphang ka Hima Langrin. Ha ka 8 tarik u January 2022 pat la pyllaitpaitbah ïa ka kot jong u KA SPILITY LYNGDOH LANGRIN – KA RIEWSHLUR KA RI KHASI ba la pyllaitpaitbah da ka Khasi Students Union Central Body bad ka KSU Delhi Unit ha Office ka KSU ha ka jingïadonlang u Bah Samuel Jyrwa u President ka NESO kum u Kongsan kaba kane ka kot ka iathuh shaphang ka jingim jong ka riewshlur kaba pyrshah ban tieh uranium ha Domiasiat kaba la kyntaid ïa ki phew klur ba la tyrwa da ka UCIL. Ha ka 29 tarik u bnai ïaïong 2022 pat la pyllaitpaitbah ïa ka kot jong u ka PHAN NONGLAIT – A LADY FREEDOM FIGHTER OF INDIA da ka Khasi Hills Autonomous District Council Shillong kaba dei ka kot shaphang ka kynthei Khasi ba nyngkong bad ka kynthei ba nyngkong na jylla Meghalaya kaba la ialeh pyrshah ïa ki shipai phareng kaba la ithuh ïa ka kum ka National Unsung Hero.
Ha kane ka 26 tarik u Nohprah, 2022 pat la ïoh ban pyllait paitbah ïa ka kot jong u kaba la ai kyrteng KI DAK KA HIMA KHASI BA LA JAHNOH ba la pyllait paitbah halor u lum Mawhiang ha Mawkyllei kaba dei ka jaka pdeng jong ka Hima Khasi kaba la jahnoh bad ïa kane ka kot la pyllait paitbah da u Bah Alertson Nongbri u Additional Deputy Commissioner ka Eastern West Khasi District kum u Kongsan bad u Bah Raphael Warjri u Artist ba pawnam ka jylla na Riti Academy kum u Kongsan Symbud. ïa kane ka kot la pynmih da ka Durbar Kur Lyngdoh Nonglait ha ka jingiadonlang jong u Bah Manly Star Lyngdoh Nonglait u Acting Basan ka Durbar Kur Lyngdoh Nonglait ha ryngkat kiwei de Ki Riewrangbah ba la pynïaid ïa ka Jingpyllait kot da u Bah Pynkhrawborlang Marwein na Nongstoin.
Ia kane ka kot la edit da ka kong Barikynti Lyndem kaba dei ka Gold Medalist bad ka Asst Lecturer jong ka Rama Krishna Mission Higher Secondary School Sohra.
Ha ka jingiathuh jong u nongthoh, kane ka kot ka dei ka kot kaba kham pher khyndiat na baroh Ki kot kiba u la thoh namar ka dei ka kot kaba u la don jingangnud ban thoh ia kane ka kot naduh ka por ba u dang dei u khynnah ap blang ap masi ha ki lum sha shilliang ka wah Rilang bad sha shiliang ka wah Kynshi kaba u lap ia kane ka jaka ha ka por u dang ap masi bad lyngba ka jingïathuh ki Riewtymmen na Nonglait la ïoh ban pynshisha shuh shuh da ka jingïathuh na kiba bun ki riewtymmen kiba la khladnoh kum jong u Bah Hoping Stone Lyngdoh, Bah Sedon Lyngdoh Bah Kringly Lyngdoh bad kiwei kiwei.
Kane ka Hima Khasi ba la jahnoh la seng da u uwei u Nongsynshar uba kyrteng u Moit Sngei. Kane ka Hima u Moit Sngei ka Synshar shaduh ki lum Mawthawpdah shaphang Shatei bad u pud sawdong jong ka uba iar naduh mihngi, Sepngi, shatei bad shathie. Kane ka Hima ka don la ka riti ka dustur, ka don la ka riam kaba ki khot ka Riam Nonglait bad la ki jong ki jingshad kum ka Shad Mawhiang bad ka Shad Khli Sngei. Kane ka Hima ka don ruh la ka jong ka Ktien kaba Stepmom ka dei ka shem nonglap bad ka nongsdang ia ka Ktien kaba ki khot ka Ktien Mawhiang. Hadien ba la jahnoh kane ka Hima jong u Moit Sngei la pynim biang da u Namdei na ka Shnong Nonglait uba la Lumlang biang ia ki saw Ki kur kiba wan hadien ban pynlong ia ka Raid Mawhiang bad la pynkhi im biang ruh ia ka Hima Mawhiang hynrei ha ka por Ki phareng Ki la pynjahnoh ia u ‘H’. Wat lada ha por ki phareng la jahnoh u ‘ H’ hynrei ka Hima kaba mih hadien ka dang pynpyndonkam ia ka Ktien jong ka Hima Mawhiang ka Ktien ba la seng naduh ka por u Moit Sngei.
Ka kyrteng jong kane ka kot ka dei kaba khring bha ïa ki nongpule. Ki Riewrangbah baroh kiba la don ryngkat ha katei ka sngi kum U Bah Manly Star Lyngdoh u la ai jingïaroh ïa u nongthoh. U Bah Alertson Nongbri u la ong ba lyngba u nongthoh ki pateng ba mynta bad kumjuh ki pateng ba dangwan ki ïoh jingtip shaphang ka Hima Khasi kaba jahnoh lyngba ka jingthoh. Katba u Bah Raphael Warjri pat u la pynpaw ba u nongthoh u don shisha ïa ka sap kum u nongthoh ba lyngba ki rai eh raidam kiba bun kiba kiba u lumlang na ki Riewtymmen u la lah ban pynkhiim biang ia ka Hima Khasi kaba la jahnoh kaba don la ka riam, ka Ktien bad ki jingjia kiba donnam jong ka spah snem ba la leit noh.
U Bah Raphael Warjri u la kyntu ruh ïa kiwei pat Ki samla pule ba kin bud ia ka nuksa jong u Bah Daniel Stone Lyngdoh ba u pynlut ïa ka por kaba bun sha Delhi hynrei u danglah pat ban noh synñiang kum u nongthoh.
Kum ban pynkut, ha kane ka ka kot u Nongthoh u la thoh ruh shaphang ka Riam Raishan bad ka Shad Raishan ha ka por jong u Namdei ba u Namdei u pynsahnam ia Ki matti u Moit Sngei u nongsynshar ka Hima Khasi ba la jahnoh . Ha kane ka kot u Bah Daniel Stone Lyngdoh u la pynkhi Im biang ia ka Riam Nonglait bad ka Riam Raishan ba la iarap da U bah Raphael Warjri ban dro bad ban design ia ki jaid riam bad jingshad katkum ba la thoh da u nongthoh.
ïa kane ka kot yn ioh ha Ri Khasi Book Agency Shillong, Amazon bad Flipkart.
