Shillong, Nohprah 30: U Superintendent of Police (SP) barim ka Shillong u Bah M. Kharkhrang ha ka sngi Thohdieng u la ong ba khamsuk ban ïakhun pyrshah ïa ki lehnoh ban ïa u drok namar ka jingjyllei jong u ka kham jur bad ka jingteh kynjri jong u ka kham shyrkhei ban ïa kiba rah ktang suloi kum ki lehnoh.
Ïa kane u Bah Kharkhrang u la ong ha ka jingïalang jong ka anti-drug campaign jong Bharatiya Janata Party (BJP) East Shillong Constituency Mandal bad kumjuh ïa ki volounteer kiban trei borbar na bynta ban rat dyngkhong ïa u drok ha ka jylla ha ka jingïalang kaba la long ha u soso Tham Auditorium.
Haba kren ha kane ka sngi u Bah Kharkhrang u la ïathuh ba ha ka por ba u dang long heh Pulit ka Shillong u la shem shibun ki samla ki la ngop ha ki kam sniew kum ka kam pynïap briew bad ha ka jingtohkit ki la phla la lap ba kidei hi kiba la shah teh kynjri ha ki sni jong ka jingkyrni drok.
“Ha kawei ka Interview ki nonglum khubor ki la kylli ïa nga, ha ka por ba long Pulit, hato khamsuk ban ïakhun pyrshah ïa u drok ne lehnoh bad khlem da artatien nga la jubab, khamsuk ban ïakhun pyrshah ïa ki lehnoh” la ong u Bah Kharkhrang.
U Bah Kharkhrang u la ïathuh ba ki samla kiba dang hapoh 21 snem ki kham kyrni bha ha u drok bad dei namar kane ki kloi ruh ban leh ïa ki kam sniew kiba ktah ïa ka lawei jong ki bad dei namar kane donkam ka jingïatreilang na ka bynta ban pynduh pyndam noh ïa u drok napoh ka jylla.
U la ong ba ka donkam ïa ki sorkar ne ïa ki tnat Pulit jong man ki jylla ban ïatreilang kumno ban tehlakam ïa ka jingwan poi u drok namar ki nongkhaïi drok ki donbynta ha man ki jylla ban pynpoi ïa u drok.
Shuh shuh u la bynrap ba ka jylla Meghalaya ka la donkam ban thaw noh daka Forensic Science Laboratory na bynta ban ïarap tohkit bad tian bishar ïa kino kino kiba shah kem haba ïadei bad ka jingkhaïi ne dih drok hapoh ka jylla.
“Ka jingïoh jamin noh kiba shah kem haba ïadei bad u Drok kadei hi namar ka jingbym don ka Forensic Science Laboratory naka bynta ban lum sakhi sabut kaba biang naka bynta ban ïarap ïa ki Pulit ban Charge Sheet” la bynrap u Bah Kharkhrang.
Nalor kane u Bah Kharkhrang u la pynpaw ba ka donkam ban syllok bad ban pynshai paidbah ïa ki samla bad ïa ki kmie ki kpa kumno ban leh na ka bynta ban pynthikna ba ki khun samla shynrang bad kynthei kin lait na ka jingshah ïalam bakla ka ban pynpoi sha ka jingngop ha u Drok.
Ha kane ka sngi la ïadonlang u President ka BJP Meghalaya u Bah Ernest Mawrie, u SP Mahanta bad kiwei kiwei ki nongïalam ka BJP.
