Ka jingthmu ka BJP ban ujor ïa ka WE Card ka pyni ba ka ïeng pyrshah ïa ki duk ki rangli: AITC
Shillong, Nohprah 30: U Vice President jong ka All India Trinamool Congress (AITC) Meghalaya u Bah George B Lyngdoh u la ong ba ka jingbyrngem ka BJP ban ujor pyrshah ïa ka jubanlak elekshon kaba ka party ka kular sha u paidbah ka jylla ba lada ka TMC kan wan ha ka bor kan ai jingkyrshan pisa kaba 1,000 shi bnai sha ki kynthei lyngba ka skhim kaba ki kular ban pyntreikam kaba la jer kyrteng kum ka Meghalaya Financial Inclusion for Women Empowerment (MFI WE) ne ka WE Card.
U Bah George u la ong ba kumba long mynta ki don kumba 1.5 lak ki long ïing kiba la pynrung kyrteng ban ïoh jingmyntoi na kane ka skhim kaba ka TMC ka kular ban ai jingkyrshan pisa bad ka jingthmu jong ka BJP ban ujor sha ka Election Commission of India ka pyni shai ba ka BJP ka long pyrshah ïa kine ki duk ki rangli kiba ap kyrmen kmang ïa ka jingkyrshan pisa na ka sorkar TMC ynda ka la wan sha ka bor.
“Kane ka sienjam kaba ka BJP ka thmu ban shim ka pynishai kdar ba ka BJP ka dei ka party kaba long pyrshah ïa ki paidbah, ki duk ki rangli kiba donkam jingkyrshan na ka sorkar,” u la ong.
U la ong ruh ba kane ka skhim kaba ka party ka kular ban kyrshan pisa 1,000 shibnai kaba kot 12,000 shisnem sha ki kynthei ka jylla ka thong hi ka jong long ban kyrshan ïa ki kynthei ba duk ba rangli ha ka jylla.
“Kum kine ki jait skhim kaba ngi kular ka pyni shai ba na ka liang jong ngi ngi la pyrkhat lupa san snem shakhmat na bynta u paidbah ynda ngin synshar ïa ka jylla ym kum kito kiba pyrkhat tabng laibnai sha khmat tang kumno ban jop elekshon,” u la bynrap.
U la ong ruh ba ka BJP tang ha ki khyndiat sngi shu ban pynlong ïa ka elekshon ha Gujarat bad Himachal Pradesh ka BJP hapoh ka jingïalam jong ka ïa ka sorkar NDA ka la pynjlan biang ïa ka skhim ai khaw ei, nangta ka jingplie ïa ki skhim kiba kot kumba 80,000 klur ha Gujarat bad lada peit sha kiwei kiwei ki jylla ruh kiba bun kiba ka BJP ka kular ha shuwa ki elekshon jong ki jylla bapher bapher,” u la ong.
U la ong ruh ba ha ki khyndiat bnai kiba kham mynshuwa ka BJP ka kren pyrshah bha ïa ka kam bamsap ka sorkar ba la ïalam da ka NPP hynrei mynta kynsan kynsan ka leh klet ïa kane ban kynthah wad daw ïa ka TMC namar ka jingthmu ban wanrah ïa ki skhim kiban myntoi ïa u paidbah ynda ka party ka la thaw ïa ka sorkar.