Yn wer ka KHADC bad TTAADC ïa ki ADC ha North-East ban pynkhlaiñ ïa ki aiñ ïada riewlum

Shillong, ïaïong, 30: Ka Khasi Hills Autonomous District Council (KHADC) bad ka Tripura Tribal Areas Autonomous District Council (TTAADC) ki la pynmih ïa ka sur ban don ka jingïakren ban lum ïa baroh ki Autonomous District Council (ADC) kiba don ha kylleng ki jylla ka thaiñ North East India kata ban ïa don lang ha kawei ka kynhun ban pynkhlaiñ ïa ka sur jingdawa na ka Sorkar India ban ai ïa ki aiñ ïada kyrpang kiba skhem ïa ki riewlum ha kine ki Jylla.
Kane ka sur ka la mih hadien ka jingïalang ïamir jingmut hapdeng kine ki ar tylli ki ADC ha Khumulwng, Headquarter ka TTAADC, myn ha ka step 26 tarik u Ïaiong, 2023 ha kaba ïa ka KHADC la lam khmat da u Bah Titosstarwell Chyne, CEM lem ki Executive Member ba kynthup ïa u Bah Martle N Mukhim, Kong Grace Mary Kharpuri, Bah Teiborlang Pathaw, Bah Mitchell Wankhar, Bah Rangkynsai Kharbuki lem ki ophisar.
Na ka liang ka TTAADC pat la ïa don lang da u Purna Chandra Jamatia, CEM, u Kamal Kalai, Executive Member, u Chandra Kumar Jamatia, Chief Executive Officer, u Captain GS Rathee, Adviser, u Shankar Debnath, Additional CEO, u Budhilian Hrangkhawl, Dy CEO bad kiwei pat.
Ha ka por janmiet pat ka la don ka jingïalang ryngkat ki prokram tynrai ha TTAADC Park ha kaba kiba la shim bynta ban kren ha kane jingïalang ki la pynsngew ïa ki mat ïakren kiba la shim ha ka jingïalang kaba la long ha ka por mynstep.
Ha kane ka jingïalang la wan ban ïa donlang ruh da ki MLA ka TIPRA ba kynthup ïa u Animesh Debbarman, Nongïalam ka Liang Pyrshah ha ka Iing Dorbar Thawaiñ ka Jylla Tripura nalor u CEM ka TTAADC, ki Executive Member nalor kiwei pat.
U Bijoy Kumar Hrangkhawl, u President ka The Indigenous Progressive Regional Alliance (TIPRA), u la ong ba dei u (L) Professor GG Swell u ba la ong ïa u ban pynthikna ïa ka Sixt Schedule ha Tripura ban ïada ïa ki riewlum. U la ong ba ki don ki bor kiba mut ban pynduh pyndam ïa ki riewlum
Ka Kong Grace Mary Kharpuri, Executive Member ka KHADC ka la ong ba ka jingwan sha kane ka jaka ka long ban ïa mir jingmut bad ïa treilang ban pynkhlaiñ ïa ka Khyrnit Bahynriew jong ka Riti Synshar ka Ri India.
U Bah Martle N Mukhim, Executive Member ka KHADC u la ong ba naduh mynshwa la shim nuksa ba ki riewlum ha Tripura ki la shah tyllep ha ki jaidbynriew bym dei riewlum. U la ong ba hap ban ïakren ban ïa tylli hapdeng ki riewlum ka thaiñ North East khnang ban ïada ïalade lyngba ki kyndon ka Khyrnit ba Hynriew.
U Chief Executive Member, Bah Titosstarwell Chyne u la ong ba kumba long hi ki riewlum ym tang ha Meghalaya bad Tripura la ïohi ba ki la shah ktah noh da kiwei pat ki bor ba nabar. U la ong ba donkam ban thaw ïa ki aiñ kumba la ïakren ban ïada ïa ka jingithuh kyrpang, ka khyndew, ka riti dustur bad ka bor ban pyntreikam ïa ki aiñ lane ka Judiciary System. U la ong ba hap ban ïakren bha halor ka jingtyrwa ka Sorkar India ban pynkylla ïa ka Khyrnit Ba Hynriew.
U Kamal Kalai, Executive Member ka TTAADC ba dei peit ïa ka tnad Health u la ong ba ha ka jingïalang ha ka por mynsngi ki la ïakren ba yn don ka jingïakren bad kiwei ki ADC ha ka thaiñ North East ban don ka jingïatylli. U la ong ba na ka liang ka TTAADC ka la ïoh ki jingmut kiba bun na ka KHADC ha kaba ïa dei bad ki aiñ khyndew bad kiwei pat.
U la ong ba ka TTAADC kan pynieng ruh ïa motdur jong u (L) JJM Nichols Roy uba la tip kum u kpa jong ka Khyrnit Ba Hynriew ha ka Riti Synshar ka Ri India. U la ong ba hap pynkynmaw ïa ka Sorkar India halor ki Autonomous District Council ban pynkhlaiñ ïa ki.
Na ka liang u Animesh Debbarman, MLA ka TIPRA bad Nongïalam ka Liang Pyrshah ha Iing Dorbar Thawaiñ ka Jylla Tripura u la ong ba ki riewlum ki la sdang pynsawa ïa ka sur. U la pynpaw ka jingbym sngew ïahap shuh ban buh ïa ka kyntien Member bad dei ban thep da ka kyntien Minister.
U la ong ba ka Sorkar India kam sngewthuh ïa ki riewlum bad ki aiñ ban ïada ïa ki bad kumta donkam ban pynsngew sha u Myntri Rangbahduh ka Ri kata u Narendra Modi kumjuh sha u Myntri Kam Pohiing ka Sorkdia Indïa u Amit Shah.