Kylla dpei ka dukan sha, ka ïing bad ka bynta ba shadien ka Rynjah State Dispensary

Shillong, ïaïong, 30: Ka Karkhana dieng, ka dukan sha, kawei ka iing bad khyndiat ki bynta ba shadien jong ka Rynjah Dispensary ki la shah bamduh ha ka ding kaba la klang ishyrkhei bha ha ka por shiteng synñia kumba 12:45 baje.
Katkum ka khubor ba la ïoh lum la ïathuh ba ka ding ka la sdang nyngkong eh na kawei ka karkhana dieng kaba don ha lyndet jong ka Rynjah State Dispensary kaba la kem ding kynsan bad ki thylliej ding barhem ki la pur sha kawei ka ka dukan sha bad sha kawei ka iing. Nalor kata, ka ding kaba rhem ka la pur sa sha ki bynta ba shadien jong ka Dispensary ha kaba ka jingjulor ka la long kaba jur.
Ka longkmie kaba dei ka trai jong ka iing ka la kren sngew bynñiaw bad pynpaw ïa ka durkhmat ba sngewsih halor kane ka jingjia ha kaba ka ding ka la bamduh ïa ka iing bad ïa baroh ki jingdon jingem baroh. Donbok ba ki 4 ngut ki khun ki lait im na ki thylliej ding khlem na kano kano ka jingjia kaba sngewsih.
Kane ka longkmie ka la ïathuh ba lada ym dei na ka jingshim sting jong ki Pulit ka Rynjah Police Station bad na ka jingpoi slem jong ka kali pynlip ding ka jingjulor kan ym ktah shaduh ka iing ka jong ki.
Na ka liang jong ki briew kiba ïohi ïa ka jingpur jong ka ding ki la pyntip mar mar sha ka tnad Pulit bad sha ka tnad Fire & Emergency Services hynrei kaba sngewsih ka long ba ki Pulit kim shym la wan poi tad haduh ba ki briew ki hap ban hiar hi sha Police Station bad leit khot hi dalade ïa ki Pulit jong ka tnat pynlip ding kat haduh ba ka la shim por ïa ki haduh 2 kynta duna ban poi sha kane ka jaka.
La ïathuh ba kat haduh ban da wan poi ki Pulit bad ka kali pynlip ding baroh ki jingdon jingem ki la ingkhong bad kylla dpei lut.
Na ka liang jong ki bahaiing ki la pynrem ïa ka tnad Pulit namar ka jingshim sting bad wat hapdeng ka kamram kaba ki don. Halor kane, ki la ïathuh ba kin sa leit ban kynduh ïa u Superintendent of Police ka East Khasi Hills ban kylli halor u Emergency Number uba la ai sha ki paidbah hynrei u bym shym la treikam satia bad ban ujor halor kane ka jingpynslem jong ki Pulit ban poi sha ka jaka ba la jia ka jingpluh iing.