Nga la phiel bunsien ha ka jingim hynrei kane ka dang pynrhem bad pynkhlaiñ ïa nga: Conrad

Shillong Iaiong 30: U Myntri Rangbah ka jylla u Conrad K. Sangma myn ha ka Sngi Saitjain, ula ong ba ki samla pule ki dei ban pynkhlaiñ ïa la ka bor pyrkhat pyrdaiñ haba ki ïaid shakhmat ha ka jingim ka jongki haba pynpaw ba ki jingpass bha ha ki jingpule lem bad ka kyrdan kaba phi don kan ïai long ka jingplie kabu ïa phi hi.
Haba ai jingkren ha ka Convocation kaba saw jong ka ICFAI University kaba la long ha Tura Campus, u Myntri Rangbah ula ong, “Nga dei u briew uba la phiel la bunsien ha ka jingim ka jong nga bad bun ki briew kim tip ne bna eiei ïa kata. Hynrei kane ka jingpheil kam shym la ktah ne pynduh mynsiem ïa nga ka dang pynrhem pynban ïa ka mynsiem jong nga ba ngan ïai ialeh ban jop ïa kita ki jingeh bad ki diengpyngkiang”.
“Ngam shym la lah ban jop ha kiba bun ki bynta, hynrei nga la ïai ïaleh beit. Nga ngeit skhem ha ka bor jong ka jingduwai bad ban phaikhmat beit sha u Blei na ka bynta kiei kiei baroh. Ainguh ïa u Blei ba kiei kiei ki ïaid beit ïaid ryntih bad wat haba kim shym la long kiba bha ba man. Ngi dei ban don ka jingngeit kaba skhem ha u Blei” ong u Conrad.
“Ka khyllipmat kaba phi lah pdiang ïa ka jingpulom ne shah rem, kan dei kaei kei kaba lah ban wanrah ïa ka jingkylla ha ka jingim. Ka jingpulom ne shah rem ka long kaei kaei kaba jia na ka bynta ka jingbha.Ngeit ïa nga, kam shong tang ha kumno ngi shim ïa ka bad ngi ïaid shakhmat. Lada phi lah ban shimkhia ïa ka jingpulom ka jong phi, phin long uba la pynkhreh ban ïakhun ïa kino kino ki jingeh ne jingtynjuh bad ban pdiang ruh kumjuh ïa ka jingseisoh” ong u Myntri Rangbah.
Ula ai khublei ïa ki 544 ngut ki samla pule kiba la ïoh pdiang ïa ki Degree ki jongki na u Chancellor ka ICFAI University u Lt Gen Dr Arvinder Singh Lamba bad ka Vice Chancellor ka Dr Alicia Gatphoh.
U Conrad ula pynpaw ka jingskhem jingmut ba kitei ki samla pule kin noh synniang ha ka ban kyntiew ïa ka roi ka par jong ka jylla bad ka ri hi baroh kawei.
“Ha ki 5 snem kiba la leit, ka ri India kala long kum ka shlem jong ki karkhana bad ngi long ruh kum ka ri kaba ka ïoh ka kot kala kiew bha ha ka pyrthei baroh kawei.Bun tylli ki ri ki don hapdeng ka jingkyrduh pisa tyngka ne ki ban sa mad ïa ka jingkyrduh pisa, hynrei la khmih lynti ba ka ri India kan dei napdeng ki katto katne ki ri ki ban ym shah ktah eiei. Wat lada kan don ka jingkyrduh pisa ha kylleng ka pyrthei” ong u Myntri Rangbah.