Phi dei khun shynrang ka Kmie, weng noh na ka sorkar: Ong u Bah Samlin ïa ka UDP
Ka Sohïong kan dei kaba biej lada pynrem: Prestone
Shillong, Ïaïong 30 : Ka jingjur ka thma ktien ha ka elekshon kaban long ha Sohïong ha ka 10tarik mynta u bnai ka la poi haduh u pud ba ka National People’s Party (NPP) kan kyntu ïa ka United Democratic Party (UDP) ba kan mih noh na ka sorkar.
“Lada ki nongïalam jong ka UDP ki dei ki khun dap shynrng jong ka Kmie weng noh na ka sorkar naduh lashai,” ong u kyrtong ka NPP Bah Samlin Malngiang haba kren ha ka jingïalang ïalap elekshon kaba long ha Rangshken ha kane ka sngi Saitjaiñ.
U ong ruh ba hadien ba ki la dep ban weng na ka sorkar ki lah ban kren bad kynthoh katba mon ïa ka NPP. “Hynrei ïalade phi sdien ldui hynrei ki kyntthoh pat ba ka NPP kadei ka party ka bym long.”
Haba pynshai pat halor ka jingdon kiba kam ba ki khlem ïoh ïa ka skim, u Bah Samlin u la ong ba kum u MLA u la dep ban sam kumba 8600 ngut tam hynrei dei tang ki 14 ngut kiba khlem ïoh kumba la kam da kitei ki briew.
Shuh shuh u ong ruh ba kitei ki briew haba ki khlem ïoh ia kata ka skim ki la dei ban wan mih ym ban shu thad khamtam haba ïalade ruh ki khlem pat leit mih sha Block.
Ha kajuh ka por, u National Vice President ka NPP, Bah Prestone ba dei ruh u Symbud Myntri Rangbah ka jylla u la ong ba ki nong Sohïong kin dei kiba biej lada ki pynrem ïa u Bah Samlin ha kane ka elekshon kaban sa long shen.
“Nalor ki 25 tylli ki Department la bat lypa u Bahdeng Samlin kumta lada pynrem ïa u, ka mut ki nong Sohïong u dei uba biej bad kam don lynti shuh da kumwei pat,”u la ong. Shwa kane, u Bah Prestone u la ong ruh ba tang ki Myntri Sorkar ba dei na ka NPP ki la don lypa haduh phra ngut bad kine baroh ki don ha kti u Bah Samlin.
“Kumta kein noh ka dro dur bula, kynthah kynnoh namarba u shabi ba heh tam jong ka Secretariat ka shong ha u Conrad bad Prestone.”
Ha katei ka jingïalang kaba la wan ban sakhi lang da ki hajar ngut ki nongkyrshan ryngkat ka jingdonlang ki nongïalam ka party hapoh ka jingïalam jong u National Vice President ka Party, Bah Prestone Tynsong, ki MDC ka party bad ruh ki nongïalam jong ka NPYF.