Shillong Nailar 14 : U Nongrwai ba pawnam u Ronan Keating un wan pynlyuh pum bad pynshongshit ïa ki paidbah ha ka tamasa Shillong Cherry Blossom Festival, kaba 3 sngi ka ban long ha ka 17, 18 bad 19 tarik u Naiwieng mynta u snem.
Nalor u Ronan Keating, ha katei ka festival yn wan ruh ban ïashim bynta da ki kynhun nongtem na kylleng ki ri kiba kynthup ïa ka Pink Panda, Jonas Blue, Hybrid Theory bad Kenny Musk.
Nalor kane kin don ruh ki kynhun kiba pawnam kiba napoh ka jylla Meghalaya hi ki ban ïashim bynta ha katei ka tamasa, kiba kynthup ïa u Bah Lou Majaw, Snow White, Meba Ofilia, Da Minot, Summersalt, Emperical Tribe, Street Stories, Banjop, Lokpante, Prinstone Sutnga, Claudia, Young Natee, Wanjop Sohkhlet bad kiwei kiwei ki ban pynshongshit ïa ki paidbah kiba leit sha katei ka tamasa.
Haba ïakren bad ki nongthoh khubor u Myntri ka tnad jngohkai u Bah Paul Lyngdoh ula ong ba ïa ka Shillong Cherry Blossom Festival mynta ka kynti yn pynlong ha Ri-Bhoi District bad ïa ka jaka ban pynlong ïa katei ka tamasa yn sa pynbna paidbah kham hadien.
