ïai pyndik ka kam Syiem Hima Langrin ïa ka KHADC, kynduh Dy.CEM sa ki riwew rangbah

Shillong, Nailar 14: Ka kam Syiem jong ka Hima Langrin, ka la ïai bteng ban pynduk ïa ka Executive Committe jong ka KHADC, haba mynta ka sngi shi khrui ki riew rangbah jong ka Hima ki la wan kiew sha District Council ban leit ïakynduh ïa u Bah PN Syiem, Deputy CEM, uba peit ruh ïa ka tnad elaka.
Kine ki rangbah ki la pynpaw ba ka jingwan kiew jong ki sha Shillong ban ïakynduh ïa u Dy. CEM, kadei namar ka jingpynslem palat ka Executive Committee ban ai rai eiei halor ka jingdawa ka Seng Samla Hima Langrin bad ki khun ki hajar ban weng noh ïa u Naitei Syiemïong kum u Syiem jong ka Hima, halor ki daw kiba kiba biang kiba ka Seng Samla ka ladep ban ai da ka jingthoh sha ka District Council, ïa kaba na ka liang jong ki, ki la ong ruh ba kidei ki jingujor kiba don nongrim bad kiba shisha.
Haba kren sha ki ladpathai khubor na ki liang ki 3 ngut ki riew rangbah ka katei k thaiñ ba khynthup ïa u Bah Risperlan Wanniang, u Bah Lisparly Thongni bad u Bah Ibira Lyngdoh, ki la pynpaw ba ka jingwan ïakynduh jong ki ïa u Deputy CEM ka dei namar ka jing slem ban weng ïa u Syiem ka Hima. Ki la ong ruh ba ka KHADC ka dei ban shimkhia bha ïa kane ka mat ban weng noh ïa u Syiem namar lada pynslem ïa kane kam kan wan rah ïa ka jingeh ba khraw ha ka Hima baroh kawei bad ki la ong ruh ba ïoh lehse kan sa mih ka ka jingbitar na ki paidbah ka thaiñ bad kan mih ka jingïakulmar bad lada jia kumne, ka District Council kan hap ban shim ïa ka jingkitkhlieh.
Lah ban kdew hangne ba ka kam Syiem ha Hima Langrin, ka la khih hadien ba ka Seng Samla ka la ujor sha KHADC halor ka jingthaw u Syiem ïa ka Management Board ban pynïaid ïa ki kam ka Hima. Nangta ka jingïasam mar shiteng ïa ka pisa hapdeng ka Hima bad ka ïing u Syiem ïa ka pisa kaba ïoh na kaba shim jaka ban pynheh surok ha ka Hima. Kawei pat ka jingujor ka Seng Samla, ka long ba u Syiem u la ai donation sha ki Balang da ka pisa jong ka Hima.
Hynrei ïa kane ka jingkynnoh ka Seng Samla la kyntait da kiwei pat ki kynhun napdeng ki khun ki hajar ka Hima kiba la ong ba u Syiem u la leh ïa kine da ka jingmynjur lang ka Dorbar Hima.