Yn wan jngoh biang ka Finance Minister ïa ka jylla bad pyllait paidbah bun ki projek

Shillong, Jylliew 17 : Ka Myntri ka tnad Finance & Corporate Affairs ka Sorkar Pdeng, ka Nirmala Sitharaman, kan wan jngoh ïa Meghalaya ha ka 19 bad 20 tarik Jylliew 2026 ban shim bynta ha ka seminar halor ka phang “Leveraging Externally Aided Projects in the North-Eastern States” kaban long ha ka nongbah bad ban plie paidbah bad bishar bniah ïa ki projek kiba kongsan jong ka jylla.
Ha kane ka jingwan, ka Myntri ha ka 19 tarik Jylliew kan leit plie paidbah bad jurip ïa ka Organic Spice Processing Plant kaba heh tam ha ka thaiñ Shatei Lam Mihngi kaba don ha Bhoirymbong, Ri Bhoi District. Ïa kane ka plant la pynïaid da ka Eastern Ri Bhoi Organic Farmer Producer Company.
Hadien kane, ha ka por mynsngi, ka Myntri kan ai jingkren ha ka prokram kaban long ha U Soso Tham Auditorium, Shillong, ban rakhe ïa ka jingïaid shaphrang jong ki Externally Aided Projects (EAPs) ha Meghalaya. Ha kane ka juh ka sngi, kan buh ruh ïa u mawnongrim jong kawei ka projek thymmai ba la bei tyngka da ka EAP kaba kot haduh T. 1,200 klur.
Katba ha ka 20 tarik Jylliew, ka Myntri kan leit sha West Jaintia Hills ban ïakren bad ki samla pule jong ka Kiang Nangbah Government College, Jowai ha ka por 10:30 mynstep bad bud sa kiwei kiwei ki prokram ha katei ka jaka.