Ai dorkhas ka JSM sha ka JHADC ban pynskhem noh ïa ka aiñ ban ïada ka jait ka kynja na ka kmie

By Mawphor Editor On Jun 19, 2026

Jowai, Jylliew 18: Ka Jaiñtia Students’ Movement (JSM), Central Executive Committee, kala phah da ka Dorkhas sha u Chief Executive Member (CEM) ka Jaiñtia Hills Autonomous District Council (JHADC), Jowai ban dawa na ka Council ban pynmih mardor ïa ka aiñ kaba tip kum ka “Jaiñtia Hills Autonomous District (Registration & Protection of Clans) Act, 2026”.
Ïa kane ka Dorkhas la aiti ha u CEM hadien ka Resolution bala mynjur da ka Dorbar bah jong ka “Dorbar Ki Waheh Kur Ri Jaiñtia” kaba la dep pynlong haka 13 tarik Jylliew 2026 ha Chilliangraij, Jowai, ha kaba ki Waheh Kur na kylleng ka Ri Jaiñtia kila dawa daka juh ka sur ban don daka aiñ kyrpang ban ïada ïa ki Kur (kiba shim jait na ka kmie) hapoh ka Jaiñtia Hills.
Ki Mat ba kongsan kiba ka JSM kala pynsngew lyngba ka Dorkhas ki kynthup ïaka bor bala pynkup haka JHADC katkam ka Article 244(2) bad Paragraph 3(1)(b) jong ka Sixth Schedule ka Riti Synshar ka Ri India, ka JHADC ka don ka bor ban shna aiñ halor ka “Inheritance” (ka jingïoh pateng) bad “Social Customs” (ki riti dustur) bad ka jingthoh kyrteng ïa ki Kur.
Shuh shuh la pynsngew ïa ki jingeh ba mad ki jait kur ha Jaiñtia na ka jingbym don ïa ka aiñ ban ïada ïa ka Akhur bad ka jingïoh pateng kaba la pynmih shibun ki jingïakajia hapdeng ki para Kur. Ka jingïadei jong ka Kur naka kmie bad ka Kur jong u kpa kaba dang tlot namar ka jingbym don ïa ka register kaba pura.
La pynsngew ba ki Dorbar Kur kim pat ïoh ïa ka bor ban leh pyrshah ïa kiba pynkheiñ ïa ki riti dustur bad ka jinglong trai ïala ka Kur ka jait.
Ka JSM ka dawa jur ïa ka JHADC ban pyntreikam ïa ka aiñ “Jaiñtia Hills Autonomous District (Registration & Protection of Clans) Act, 2026” hapoh ka Paragraph 3(1)(b) jong ka Sixth Schedule. Ban pynrung ïa ka Draft Bill haka Session ban wan jong ka JHADC. Ban pynlong da ka jingïatai paidbah ryngkat ki Waheh Kur bad kiwei de ban pynkhreh ïa ka Draft Bill.
Naka liang u President ka JSM samla Leningstar Rymbai, ula ong “lada khlem ka aiñ kaba skhem ka jinglong trai kan duh kan dam namar ka jingïada ïa ka jait ka kynja ka dei ka jingïada ïa ka Jaitbynriew.”
U General Secretary samla Roitre Dkhar, u ong kane ka dei ka jingkitkhlieh lang jong baroh naduh ki riew rangbah bad ki khun samla ban ïada ïa ka riti ka dustur, ha ka juh ka por ka seng ka kyrpad ïa baroh Waheh Kur, Rangbah Shnong bad ki paidbah ka Rilum Jaiñtia ban don ka jingïatrei lang ban kyrshan ïa kane ka jingdawa jong ka Dorbar Ki Waheh Kur Ri Jaiñtia. Pynkut ka kyrwoh khubor bala phah da u Publicity Secretary ka JSM Central Body samal Heihokmi Supuh.