Nongpoh, Naiwieng 27: Ka seng Hynñiewtrep Achik National Movement (HANM) mynta ka sngi ka la rai syndon ban ai da ka jingthoh sha ka Khasi Hills Autonomous District Council (KHADC) bad sha u Deputy Commissioner ka Ri Bhoi ban ujor halor ka jingbteng beit ka sorkar Assam ban shna ïa ka surok ha ka shnong Bakhlapara ba hap ha ka Hima Nongspung hapoh ka jylla Meghalaya.
Kum ban pynkynmaw, ka HANM, Western Ri Bhoi ryngkat u Paiem ka Hima Nongspung dang shen ki la wan ban pynsangeh ïa katei ka jingwan shna surok ka Assam da kaba kam ba katei ka jaka ka la hap hapoh ka Hima Nongspung hapoh ka jylal Meghalaya, hynrei kumba long haduh kine ki sngi ka sorkar Assam kam shym la sngap satia bad lyngba u Contractor ka dang pyntrei shaid shaid ïa katei ka surok ba kum ka Hima Nongspung bad ka seng HANM, Western Ri Bhoi ki da pyrshah jur ba kumno ka Assam kan wan kyntur pud sha u pud u sam ka jylla Meghalaya.
Haba ïa kren bad ki Nongthoh Khubor mynta ka sngi, u President ka HANM, Western Ri Bhoi bad u Working President ka HANM, Ri Bhoi District, ki la ong ba ki dap da ka mynsiem jong ka jingsngewkhia halor kane ka kam kyntud pud ka Assam, ha kaba wat la ka jingïapynbeit pud hapdeng ka Assam bad ka Meghalaya ka dang ïaid shaphrang bad ka Assam pat ka wan shna ïa katei ka surok sha u pud u sam ka Meghalaya khlem da don jigngtip naduh u Syiem ka Hima Nongspung, ka bor District na Ri Bhoi, ka KHADC bad wat ka sorkar jylla.
“Ngim lah ban shu sngap jar halor kine ki kam wan kyntur pud jubor ka Assam ban wan rah da ki kam pynroi sha u pud u sam ka jylla Meghalaya bad dei namar kane ka daw kum ka seng naduh ba sdang ka la leit ban pynsangeh ha kaba ka sorkar Assam pat kam sngap satia” ong kitei ki nongïalam ka HANM na Ri Bhoi, bad bynrap ruh kumba la ioh lum jingtip ka seng ka Assam haduh kine ki sngi ka dang pyntrei shaid shaid ïa ki kam kaba sah mynta sa tang ban siang rong bad katba na ka sorkar Meghalaya pat kam don kano kano ka jingshim khia ban ïa kren halor kane ka jingwan kyntur pud ka Assam” ki la bynrap.
Shuh shuh, kitei ki nongïalam ka HANM na Western Ri Bhoi bad na Ri Bhoi District, ki la ong ba ki lah ban shu shong kli kti ban peitkai halor kine ki kam kyntur pud ka Assam bad na ka bynta ban ïada ïa ka khyndew ka shyiap ka la rai ban leit ai syndon da ka jingthoh sha ka KHADC, Deputy Commissioner ka Ri Bhoi bad ruh sha u Syiem ka Hima Nongspung ba kin shim khia ban ïa kren sha ka sorkar na ka bynta ban pynsangeh ïa kane ka jingwan shna surok ka sorkar Assam sha ka Shnong Bakhalapara kaba dang hap ha ka Hima Nongspung hapoh ka jylla Meghalaya, ki la bynrap.
