Shillong, Naiwieng 27 : U Myntri Rangbah ka Jylla Conrad K Sangma ryngkat bad u Symbud Myntri Rangbah bah Prestone Tynsong mynta ka Lah Sngi U Blei ki la plie paidbah ïa ki surok bad ki jingkieng ba dang shu dep shna thymmai ha ka jingïalang kaba long ha madan Nengmandalgre East Garo Hills.
Kine ki surok ki dei kiba la tip da ka L051-Nengmandalgre sha Daribokgre (Mandalgre) ba 35 kms, L042 Cherangre sha Sisobibra (Nengmandalgre to Gitokgre) ba 7.820 kms, ka jingkieng ba 51.68 metre halor ka wah Rongon bad jingkieng ba 51.68 metres halor ka wah Rongre.
Kiba la ïadonlang ha kane ka jingïalang ki kynthup ia u Myntri Sorkar bad MLA ka thaiñ Marcuise N Marak bad ka MP ka Tura Agatha K Sangma.
Haba ai jingkren, u Myntri Rangbah ula ong ba kine ki surok kiba la plie ki dei kiba kongsan bha na ka bynta ka roi ka par jong ka thaiñ.
“Ki surok ki long kiba kongsan bha ïa ka roi ka par jong kino kino ki jaka bad khlem ki surok, ki kam pynroi ruh kin ym poi” ula ong.
Haba ai khublei ïa ka MP Agatha K Sangma kaba la ïarap ban wanrah ïa kane ka surok lyngba ka PMGSY jog ka Sorkar Pdeng, ula ong ba ka Meghalaya ka dei kawei na ki Jylla ba pyntreikam bha ïa ka skhim PMGSY.
U Myntri Rangbah ula kren ruh ïa ki 5 tylli ki mat treikam ba hakhmat ka Sorkar Jylla. “Ngi don san tylli ki mat treikam ba hakhmat eh bad kita ki long ka surok ïa baroh, ka bording ïa baroh, ki ïing ïa baroh, ki jingnang jingstad ïa baroh bad ka um ïa baroh. Ngi la treikam mynta ha kata ka rukom kaba ngin lah ban kynjoh ïa kane ka thong ha kine ki khyndiat snem ban wan” ula ong.
U Conrad u pyntip ba ha u snem 2023-2024, hapoh ka skhim PMAY, ka Sorkar kala pyllait pisa haduh T.1600 klur na ka bynta ban shna ïa ki 1500 tylli ki ïing bad ula ai khublei ïa kane ïa ka MP kaba la shimkhia ban pynurlong.
Shuwa kane, u Symbud Myntri Rangbah Bah Prestone Tynsong, ula ong ba ki surok ki dei ki jingkyrkhu ïa ka ïoh ka kot, ka koit ka khiah, ka pule dangle bad ki kam ba manla ka sngi jong ki briew kiba don ha ki shnong ba ïaid kine ki surok haba ong ba ka Sorkar kala pynthikna ba ka roi ka par ka poi ha manla ki shnong.
U Bah Prestone ula ïathuh ba hapoh ka PMGSY, ka Jylla kala lah ban pyntrei haduh 1200 Km ka surok ha kylleng ki jaka. Ula pan ïa ka jingïatreilang jong ki Nokma, Sordar bad ki trai jaka haba ïadei bad ka jingïadie iathied jaka ban shna ïa ki surok na ka bynta ka bha ka miat jong ki paidbah ka Jylla.
Ka pisa bala mang ïa ka Jingkieng halor ka wah Rongre bad ka surok Jakopgre sha Nengmandalgre ka long T. 176.969 lak bad ïa ka jingkieng halor ka wah Rongon bad ka surok Jakopgre sha Nengmandal ka long T. 151.140 lak.
