Shillong, Naiwieng 27: Ka Khun Hynniewtrep National Awakening Movement (KHNAM) ka la dawa ban ai ïa ka bhah thungkam ba 80 percent ïa ki trai shnong ne paid riewlum ka Jylla ha ki Ophis treikam jong ki kompani shimet ha ka jylla.
Ha ka shithi sha u Chief Secretary ka Jylla Bah DP Wahlang, u President ka KHNAM Bah Pyndapborthiaw Saibon ula ïathuh ba ka party ka la nang ai ïa ki jingai jingmut bynrap, ban pynrung ha ka jingtyrwa ban pynkylla thymmai ïa ka State Reservation Policy.
“Ngi dawa ba ka bhah thungkam ba 80% ha kino kino ki kam ba lait haki Ophis jong ki kompani ki riewshimet ba dei ban buh bhah na ka bynta ki paid riewlum ka Jylla Meghalaya” ong u Bah Pyndap.
Haba pynksan ïa kane, u President ka KHNAM ula ong “Haba khmih ïa ka jingnang kynton ka jingbym ïoh kam ïoh jam hapoh ka Jylla, ngi sngewthuh ba ka Sorkar marwei kan nym lah ban aikam lut, kumta, lada ki Ophis treikam ki riew shimet bad kompani ki shah kdup lang hapoh ki kyndon ka SRP, kane kan ïarap bha ha ka ban ïakhun ïa ka jingbym ïoh kam ki samla hapoh ka Jylla”.
“Nalor kata, ka Office Memorandum (OM) ba 18 tarik Jylliew, 1973 para 7.2, kala dep kynthup lypa ïa ki Public Undertaking, ki Institute ba ïarap ka Sorkar bad ki Contractor hapoh ka SRP. Kumta, ngim ïohi ban don kano kano ka jingeh ha ka ban kynthup lang ïa ki Ophis treikam ki riewshimet bad ki kompani ruh hapoh ka SRP” ula bynrap.
Ka KHNAM kala dep ban aiti ïa ki jingai jingmut ban pynrung ha ka jingthmu pynkylla ïa ka SRP,1972 bad ïa ki Office Memorandum lyngba ka shithi ba 31 tarik Jymmang, 2023.
“Ngi kwah ban pynpaw ïa ka jingsngewkhia halor ka jingslem ban shim rai ïa ki amendment haba kyrpad ïa ka Sorkar ba kan kham pynsted noh ïa ka kam khnang ban ïoh shimrai noh kham kloi” ula ong.
