Yn thiah surok ki KSU ba kuman ka NHAI ban moramot ïa ka surok NH-6

Khliehriat, Nailur 15: Ka jingïalang jong ka KSU East Jaiñtia Hills District Unit kaba la long ha ka 14 tarik mynta u bnai, ka la shim ia ka sien jam kaba ar ban pynlong ka jingiakhih paidbah da kaba thiah hapdeng surok bah NH-6 ha Khliehriat kaba dei ka nongbah jong ka District East Jaiñtia Hills District.
Ka Kyrwoh ba la phah da u Samla Hamewanpynhun Ryngkhlem, Publicity Secretaty jong ka Seng, ka ong ba kane ka jingiakhih yn pynlong ha ka 25 tarik mynta u bnai naduh ka por 10 baje mynstep haduh haduh 4 baje janmiet. Ïa kane ka rai la shim hadien ba ka National Highway Authority of India (NHAI) kam shym la patiaw ne sngap ïa ka jingdawa ka seng ha ka wat ba nyngkong jong ka jingiakhih ha khmat Tollgate ha Lumshnong myn ha ka 08/08/2023.
Ka Seng ka ong ba ka jingïakhih kaba nyngkong kaba la wan ia shim bynta naduh ki Rangbah Shnong jong ka thaiñ elaka Narpuh lem bad ki paidbah ba bun. U Manager Technical jong ka NHAI u Biswa Jyoti Lahkar u la kular ban pyndep ïa ka jingmarmot ïa ka surok hapoh ka 6 taïew kaba mut un sdang naduh ka 09/08/2023, hynrei kata ka 6 taïew ka la jan kut, hynrei ym don dak eiei.
Shuh shuh la ong ba dang ha kine ki khyndait sngi ka seng ka la hiar shaduh Ratachera ban jurip, la lap pynban ba ka surok u nangjot nangjot rathai katba nangmih ki sngi bad kane ka pyni ïa ka jingkular kai kular thok jong ka NHAI. Dei halor ka jingleh bymsuid ñiew ka NHAI kumjuh ka sorkar ka la pynlong ruh tang ka jaka ïaid na surok ym don jaka shuh ïa ki paidbah. “Ym don ba nud shuh ban mih iaid kai sha surok bad por slap da ka ktieh por rang rkhiang da u pum pum bad la i sangsot shisha ïa u paidbah, kat sha ba leit ka jingsahkut kali”, la ong ka Seng.
Kumta ka seng ka khot ka wer ïa ki paidbah nongshong shnong ka East Jaiñtia Hills District baroh kawei bad ia kiwei kiwei ki paralok Sengbhalang, ban wan ban ïasnoh kti lang ha katei ka jingiakhih ba jai jai da kaba ngin thiah hapdeng surok bah. Ka long shisha ka jinglehraiñ kaba khraw ïa ka sorkar jylla ha khmat ki 4 tylli ki jylla ka thaiñ shatei lam mihngi kum ka Mizoram, Tripura, Manipur bad Assam, namar ba kane ka surok bah ka dei kaba pynïasoh bad kitei ki jylla.
Shuh shuh hadien ba la ïohi ba ka NHAI bad sorkar jylla kim leh eiei halor ka jingsniew tasam kane ka surok ,ka seng kam banse ban shim sa kawei ka sienjam kata hadien ba la kut ka jingthiah surok ha katei ka sngi, ha katei ka juh ka tarik ka khot ngi wer lang ïa baroh ki paradoh para snam ki nongshong shnong ka District bad kito ki jylla ba marjan, ka seng ka kyntu ba ngin sangeh ka leit ka wan, ka kamai kajih, ki kali bad rit bad khraw naduh ka janmiet jong katei ka sngi bad tarik naduh ka por 7 baje janmiet haduh ka por 5 baje mynstep. Kane kan bteng haduh shi taïew lynter tang por mynmiet. Ïa kane ka jingkhot ban sangeh leit jingleit yn pyllait tang ïa ki Ambulance bad kiwei kiwei ki kali ba donkam palat kiba ym lah ban kiar. Ka Seng ka kyntu ruh ïa ki paidbah ban ym pynmih kino kino ki jingklumar ha ki kynta jong ka jingthiah surok ne ha ki kynta jong ka jingsangeh leit jingleit por mynmiet. Kiba thaw jingkulmar kin shim hi ka jingkitkhlieh, ki bor jong ka aiñ kin pynshitom.
Ha kajuh ka por ka Seng ka kyntu ïa baroh arngut ki MLA jong ka East Jaiñtia Hills ban kren ïa ka surok NH-6 ha ka dorbar synrai kaba dangïaid mynta hapoh Assembly.
“Ki nongmihkhmat jong ka District kim dei ban sngap jar haba kat kane ka jingeh ki paidbah ki ïakynduh”, la ong ka Kyrwoh na ka Seng
Ka seng ka kyntu ia ki nongmihkhmat bad khamtam ïa arngut ki nongmihkhmat ka thaiñ, kata u Bah Kyrmen Shylla MLA 6 Khliehriat bad i Kong Santa Marry Shylla MLA Sutnga Saipung ban rah ïa ka jingeh ki paidbah East Jaiñtia Hills na ka surok NH-6 ha Assembly.
Ki MLA jong ngi kin hap ban kylli jingkylli na ka sorkar  lynba u myntri ba dei peit  Bah Prestone Tynsong PWD Minister balei ka NHAI ka ïoh leh mon haduh katne katne kat haduh ba kam sngap ïa ka jingdawa ki paidbah ban moramot noh ïa kane ka surok.