Yn tei ïa ka jaka Centre of Excellence jong ki Nongrep ha Jongksha, Mawkynrew Constituency

Shillong, Nohprah, 23: U MLA ka Mawkynrew Constituency, Bah Banteidor Lyngdoh uba dei ruh u Myntri ka tnad Agriculture bad Sports ka Sorkar Jylla u la ong ba ka Centre of Excellence ïa kaba la mang ban tei ha ka shnong Jongksha kan long ka jingmyntoi bad jingkyrkhu ïa ki nongrep ka thaiñ ha kaba kin ïoh ïa ki jinghikai ha ki bynta ki bapher bapher da ki riewtbit.
Haba kren ha ka jingïalang buh ar tylli ki mawnongrim ban tei ïa katei ka Centre of Excellence ha Jongksha ha ka mang tyngka kaba long 10 klur bad kumjuh ia ka Multipurpose Indoor Hall ban tei ha ka shnong Umkhoi ha ka mang tyngka kaba long 8 klur tyngka, u Bah Banteidor u la ong ïa kine ki ar tylli ki projek shen yn sa pyndep noh ïa ki.
Katei ka Centre of Excellence ha kaba yn don ka Training Centre ka thmu ban pynroi pynphriang bad ban ai ka jingstad jingtip halor ka kam rep katkum ka juk jingstad ba mynta ryngkat ka jingthmu hi ban kyntiew ïa ka ïoh ka kot ki nongrep. Kane ka Centre kan pynleit jingmut ha ki jait jingthung kiba heh dor khlem da donkam shibun ka jaka.
Ha kane ka Centre of Excellence ka don lai bynta – ka jingwad bniah, ka jingpyntreikam ka jinghikai ïa ki nongrep bad ynda la pyntrei kam ïa ka Centre yn lah ban pynmih ïa ki symbai jhur ne jingthung, ki syntiew kiba lait na jingpang ne ki khniang bad kan pynleit jingmut ha ka kam rep jhur bad syntiew.
Kumjuh ruh ha kane ka Centre kin don ki hi-tech polyhouse ha kaba yn hikai ïa ki nongrep ban rep ha kum kitei ki ïing plastic ïa ki jait jingthung kiba ïa dei bad mih bha ha ka thaiñ da kaba shim ka jingïatreilang bad ki Village Organisation ne ki Self Help Group.
ïa kane ka Centre yn tei ha ka jaka kaba heh 9 acre tam ïa kaba la ïa don jingpynbeit bad ki trai jaka kiba dei na ka kur Kharsahnoh.