Shillong, Nohprah, 28: Ka thaiñ War Jaiñtia ka dei ka thaiñ kaba bun byllai ki jaka jngohkai pyrthei kiba itynnat bad kiba khring haduh katta katta ki nongjngohkai pyrthei ym tang na la jong ka ri hynrei wat nabar ri.
Ha ka sngi Balang u Myntri ka Sorkar Jylla u Bah Lahkmen Rymbui uba long ruh u MLA jong ka Amlarem Constituency u la plie paidbah ïa kawei ka jaka jngohkai pyrthei ha kshaid Nohkawang kaba don sharum jong ka Satpator bad Trangblang kaba dei ka jaka jong ka Kur Lyngdoh.
U Bah Rymbui haba kren kum u kongsan u la ïaroh ïa u nongïalam jong ka Kur Lyngdoh u Bah Rajip Lyngdoh uba la trei shitom lyngba ka Khlaw Kur Lyngdoh kaba dei ka nongkynti jong kane ka khlaw kaba don ïa kane ka kshaid.
“U Blei u la ai ha ngi ïa ka mariang kaba itynnad ha baroh ki jaka bad ka shong pat ha ka jingpynïaid bad pyndonkam jong ki briew kumno ban pyntrei kam ïa ka,” ong u Bah Rymbui.
“Ha kine ki shiphew snem nga sngewkmen ba ki paidbah ki la tip kumno ban kyntiew ïa ki kam jngohkai pyrthei, hynrei ha ka thaiñ War Jaiñtia ka jingeh ka long wat lada ka don ïa ki jaka kiba itynnat hynrei ki dei ki jaka jong ki Kur bad jong ki riewshimet bad ka shem jingeh bha ïa ka tnat Jngohkai Pyrthei jong ka Sorkar Jylla ban pynurlong katkum ka jingkwah,” u la ong.
“Ka Elaka Satpator ka la don ïa ka Kshaid Nohkawang bad ka krem Pubon ha Syndai, ka Beach ha Pasadwar,” la ong u Bah Rymbui bad bynrap, “barabor ki trai jaka ki dei ban ïakynduh bad ka Sorkar khnang ba kin tip kumno ban pyntreikam ïa ki projek ban kyntiew ïa ki kam jngohkai pyrthei namarba kumba la ïohi ha kine ki snem ba ladep ka Sorkar ka ladep ban mang pisa ha bun ki jaka ha War Jaiñtia hynrei ki jingeh ki mih na ka daw ba ki don ki bynta kiba khang ban pyndep ïa kine ki kam jngohkai pyrthei. Ki don ki jaka kiba ym lah ban pynshna bad don ruh ki jaka ba ki ïadon ar liang mamla. Kumta barabor ki trai jaka ki dei ban ïakynduh bad ka tnat Jngohkai Pyrthei.”
U la ong ruh ba kaba kongsan eh ka dei ka surok kaba pynïasoh na kawei ka shnong sha kawei pat. Ka surok kaba donkam bha ka dei kaba pynïasoh na Trangblang sha Amlanai bad sha Pasadwar khnang ba kan pynsuk ïa ki nongleit nongwan. “Kane kan long tang lada ki trai jaka ki don kawei ka jingmut, u la ong.
Shuh shuh u la ïathuh ba ka kam jngohkai pyrthei kam dei kaba pynim jakpoh tang ïa uwei ne arngut hynrei ïa baroh kiba don ha kane ka thaiñ ba ki don ki Park bad ki Kshaid. U la ong ruh ba tnat Jngohkai Pyrthei ka don bun ki projek bad ki skhim bad ka shong pat ha ki trai jaka kumno ban leh.
U Waheh Shnong jong ka shnong Trangblang u la kitbok kitrwiang ïa ki nongpynïaid jong ka kshaid Nohkawang ba ki don jingmut ban pynroi pynpar ïa ka thaiñ bad sngewnguh ruh ba ki don ka jingkwah jong ki ba kin ïatreilang bad ka shnong ka thaw ka elaka ruh baroh kawei ym tang da ka jinglah jong ki.
U Bah Lamdibok Sumer u la ïaroh ïa u Bah Rajip Lyngdoh u Kñi jong ka Kur Lyngdoh uba la prat lynti ban pynurlong ïa kane ka jaka jngohkai pyrthei kat haduh ba la lah ban pyntrei ïa ka lynti ïaid kjat kaba pynsuk ïa ki paidbah ban poi sha ka kshaid.
Ha kane ka sngi, la sakhi lng da u General Secretary jong ka Elaka Satpator u Bah Supporter Pohkyrnu, u MDC barim u Bah Lamdibok Sumer, u Dolloi ka Elaka Satpator u Bah Daman Lakashiang, u Adviser jong ka Elaka Satpator u Bah Kolmen Pohshna bad kiwei kiwei.
